काठमाडौं । तेस्रो संस्करणको साफ यू–१८ च्याम्पियनसिप फुटबल नेपालमा आयोजना हुँदैछ । शुक्रबारबाट सुरु हुने च्याम्पियनसिप असोज १२ गतेसम्म चल्नेछ ।
घरेलु मैदानमा आयोजना हुने प्रतियोगिताको लागि नेपालले अन्तिम तयारी समेत गरिसकेको छ । नेपालले जया गुरुङको कप्तानीमा २३ सदस्सीय टोलीको घोषणा समेत गरिसकेको छ ।
हल्चोकस्थित सशस्त्र प्रहरी बल एपीएफको रंगशालामा मैदान उत्रदा नेपाल साविकको विजेताको हैसियतमा हुनेछ । नेपालले अघिल्ला दुई संस्करणकै उपाधि जितेको थियो । नेपालमै भएको पहिलो र भुटानमा भएको दोस्रो संस्करणको उपाधि नेपालले जितेको थियो ।
नेपाल यस संस्करणको उपाधि जित्दै ह्याट्रिक गर्ने दाउमा हुनेछ । तर, घरेलु मैदानमा उपाधि जोगाउन नेपालले ठुलो चुनौती पन्छाउनु पर्नेछ ।
तर, नेपाली टोलीका मुख्य प्रशिक्षक चेत नारायण श्रेष्ठ भने घरेलु मैदानमा आफ्नो टोलीले उपाधि जित्नेमा विश्वस्त छन् । प्रतियोगिताको लागि टिम राम्रो रहेको र बेन्च पनि बलियो रहेकाले नेपालले प्रतियोगिता ह्याट्रिक गर्नेमा आफु विश्वस्त रहेको प्रशिक्षक श्रेष्ठको भनाई छ ।
'समग्रमा टिम राम्रो छ । हाम्रो बेन्च पनि राम्रो छ । यो टिमबाट धेरै आशा छ । उत्साहका साथ खेलाडीहरु तयारी गरिरहेका छन् । खेलाडीको आत्मविश्वास राम्रो छ । हामी उपाधि जित्नेमा विश्वस्त छौं,’ श्रेष्ठले खेलपाटीसँग भने ।
प्रतियोगिताका लागि नेपालले साउन तेस्रो साताबाट टिमको तयारी सुरु गरेको थियो । पहिलो चरणमा ललित स्मृति यू-१८ प्रतियोगिता, जिल्लामा उत्कृष्ट प्रदर्शन गर्ने खेलाडी र कोरियाको एकेडेमीबाट खेलिरहेका मनिष डाँगीसहित ४६ खेलाडी बोलाईएको थियो । र, प्रशिक्षक श्रेष्ठले चरणबद्ध प्रशिक्षणपछि २३ सदस्सीय टिम तयार गरेका छन् ।
उपाधिमा ह्याट्रिक गर्ने लक्ष्य लिएको नेपालले शुक्रबार माल्दिभ्ससँग खेल्दै प्रतियोगिताको सुरुवात गर्नेछ । समूह 'ए' मा रहेको नेपालले दोस्रो खेलमा असोज ५ गते भुटानसँग खेल्नेछ । समूह 'बी' मा भारत, श्रीलंका र बंगलादेश रहेका छन् । समूहका शीर्ष दुई टिम सेमिफाइनल प्रवेश गर्नेछन् ।
सहज मानिएको समूहमा रहेको नेपाललाई सेमिफाइनल पुग्न कठिन भने हुने छैन । त्यसपछिका खेलमा भने नेपालले कठिन चुनौती पार गर्नु पर्ने हुन्छ । किनकि अर्को समूहमा रहेका भारत र बंगलादेश निकै अब्बल टिम रहेको छ । यो कुरा प्रशिक्षक श्रेष्ठले समेत बुझेका छन् ।
'पहिला राम्रो नतिजा आएको थियो । यसपटक चुनौती बढि नै छ । भारत र बंगलादेश निकै बलिया छन्,’ प्रशिक्षक श्रेष्ठ भन्छन् ।
प्रतियोगिता अघि नेपाली टोलीलाई अन्तराष्ट्रिय खेलको अनुभव बटुल्ने अवसर भने मिलेन । भारत, माल्दिभ्स र बंगलादेशले भने प्रतियोगिताअघि अन्तर्राष्ट्रिय अनुभव बटुलेका छन् । अखिल नेपाल फुटबल संघ (एन्फा) ले अन्तराष्ट्रिय मैत्रीपूर्ण खेल राख्न नसकेपछि प्रशिक्षक श्रेष्ठ टिम लिएर अन्तिम तयारी गर्न पोखरा पुगेका थिए ।
पोखरामा नेपाली टोलीले जिल्ला स्तरिय टिमसँग मैत्रीपूर्ण खेल खेलेको थियो । त्यसअघि नेपालले काठमाडौंमा विभागीय टिमसँग केहि अभ्यास खेल खेलेको थियो । त्यसैले प्रशिक्षक श्रेष्ठ तयारीमा भने खुसी छैनन् ।
'पोखराको तयारी त्यति राम्रो भएन । सोचेको जस्तो तयारी गर्न टिम भएन । त्यसैले हाम्रो तयारी यतिमै सिमित छ,’ श्रेष्ठले भने ।
तर, केहि अनुभवी खेलाडी र कोरियाको एकेडेमीमा रहेर खेलिरहेका मनिषको आगमनले प्रशिक्षक श्रेष्ठलाई केहि राहत मिलेको छ ।
टिममा मनिषसँगै नितिन थापा, व्रिजेश चौधरी, जया गुरुङ, मनिष थापा जस्ता खेलाडी टिममा हुनु प्रशिक्षक श्रेष्ठले बलियो पक्ष मानेका छन् । राष्ट्रिय टिमको बन्द प्रशिक्षणमा रहँदै आएका नितिन पछिल्लो समय एएफसी यू–२३ च्याम्पियनसिप छनोट खेलेको थिए ।
'हामीले अन्तराष्ट्रिय अनुभव नपाएको हो । तर, अन्तराष्ट्रिय प्रतियोगिता खेलेका खेलाडी छन् । मिडफिल्डरमा रहेका खेलाडी सबै राम्रा छन् । त्यसले धेरै सहयोग पर्छ उपाधि जित्नको लागि । उनिहरुले अगाडि पछाडि राम्रो गर्न सक्छन्,'
प्रशिक्षक श्रेष्ठ भन्छन् , 'मनिष पनि सेट भैसकेका छन् । मनिषको आगमनसँगै हाम्रो खेलाडीलाई ५० प्रतिशत मोरल हाई छ । हाम्रो लक्ष्य भनेको उपाधि जित्ने हो । हामी जित्नको लागि खेल्छौं ।’
यस पटक प्रशिक्षक श्रेष्ठलाई टिमसँगै आफुलाई पनि प्रमाणित गर्न अवसर रहेको छ । यसअघि श्रेष्ठले नेपालको यू–१८ र यू–२१ को टिम हेरिसेका छन् । तर, दुवै पटक टिमलाई उपाधि जिताउन भने सकेका छैनन् । त्यसैले श्रेष्ठलाई पनि टिमसँगै आफुलाई प्रमाणित गर्ने मौका छ ।
-1747226778.jpeg)
