काठमाडौं । नेपाली महिला फुटलब टिमको इतिहास धेरै लामो छैन । नेपालले सन् १९८० मा पहिलो पटक राष्ट्रिय टिम तयार गरेको थियो । राष्ट्रिय टिम बनेको ६ बर्षपछि नेपालले एएफसी वुमेन्स च्याम्पियनसिपमार्फत अन्तराष्ट्रिय फुटबलको पाईला राखेको हो ।
त्यसयता महिला फुटबलले धेरै प्रतियोगिता खेलिसकेको छ । तर दक्षिण एसियाली महिला फुटबलमा बलियो राष्ट्र मानिएपनि नेपालको हातमा एक उपाधि समेत परेको छैन । प्रष्ट रुपमा भन्दा नेपाल उपाधिबाट सधै बिमुख हुदै आएको छ ।
दक्षिण एसियाली खेलकुद प्रतियोगिता साग-साफमा मात्र सिमित महिला टिमले गत बर्ष पहिलो पटक सन् २०२० को ओलम्पिक छनोट खेल्ने अवसर पाएको थियो ।
प्रतियोगितामा नेपाल पहिलो चरण पार गर्दै दोस्रो चरणमा प्रवेश गर्यो । तर यात्रा त्यस भन्दा अघि बढ्न सकेन ।
नेपालले गत बर्षनै भारतमा भएको हिरो महिला गोल्डकप खेल्न पायो ।
नेपाली महिला टिमले सबैभन्दा धेरै खेलको प्रतियोगिता भनेको साफनै हो । सन् २०१० बाट सुरु भएको साफ विराटनगरसम्म आईपुग्दा पाँचौ संस्करणसम्म पुगेको छ ।
तर दुर्भाग्य नेपाल ४ पटक उपविजेतामा सिमित बन्यो । अर्को एक पटक सेमिफाइनलबाटै बाहिरियो ।
सबै भेटमा नेपालको तगारो भारतीय टिमनै बन्यो ।
यस्तै, सन् २०१० र २०१६ मा आयोजना भएको सागमा पनि नेपाल दुबै पटक उपविजेता सिमित बन्यो । नेपालको उपाधि यात्रामा तगारो अरु कोही नभएर भारतनै थियो ।
यस्तै, भारतले गत माघमा हिरो गोल्डकपको आयोजना गर्यो । तर नेपाली महिला टिम उपविजेतामै सिमित बन्यो । यसपटक नेपाललाई निराश बनाउने टिम म्यानमार बन्यो । तर खुसीको कुरा नेपालले भारतलाई हराउँदै फाईनल यात्रा तय गरेको थियो ।
फेरी एक ऐतिहासिक सफलताको नजिक नेपाली टिम रहेको छ ।
यतिबेला किर्गीस्तानमा नादेझ्दा कप चलिरहेको छ । नेपाल फाईनलसम्म पुगेको छ । महिला फुटबलमा ईतिहास रच्न नेपाल एक कदम पछाडी छ ।
नेपाल पहिलो पटक प्रतियोगितामा सहभागी भएको हो । तर फाईनलमा नेपालले फिफा वरियतामा आफुभन्दा निकै माथि रहेको उज्वेकिस्तानको चुनौती सामना गर्नेछ ।
उपाधिका लागि दुवै टोली भोली (बिहीबार) नेपाली समय अनुसार अपरान्ह पौने ४ बजे भिड्नेछन् ।
खेल काराकोलस्थित सेन्ट्रर स्टेडियममा हुनेछ ।
नेपाली महिला टिम पहिलो पटक उपाधि जित्ने लक्ष्य सहित मैदान उत्रने पक्का छ । साथै समुह चरणमा उज्वेकिस्तानविरुद्व हारको बदला लिने अवसर समेत नेपाललाई छ ।
दुवै टिम यसअघि समूह चरणमा भिडेका थिए । उज्वेकिस्तानले नेपाललाई २–० ले हराएको थियो ।
गोलरक्षक र डिफेन्डरले बारम्बार गल्ती गर्दा नेपाल पराजित हुन पुगेको थियो ।
फिफा बरियतमा नेपाल १ सय १ औ र उज्वेकिस्तान ४४ औ स्थानमा रहेको छ ।
१८ खेलाडी र ५ अफिसियल सहित किर्गीस्तान पुगेका मुख्य प्रशिक्षक हरि खड्काले यस पटक पनि गोलरक्षक र डिफेन्डरलाई सुधार गर्न सकेका छैनन् । फाइनलमा नेपालले कमजोरीमा सुधार गरेमा इतिहास रच्न सक्नेछ ।
फिफा बरियतानै नपाएको किर्गीस्तानले पहिलो पटक चार टिमलाई सहभागीता गराउँदै नादेझ्दा कप आयोजना गरेको हो ।
राउण्ड रोविनका आधारमा खेलाईएको प्रतियोगितामा शीर्ष दुई उपाधिका लागि भिड्न लागेका हुन् । नेपालले प्रतियोगिताको पहिलो खेलमा आयोजकलाई ८–२ गोल अन्तरले पराजित गरेको थियो । दोस्रो खेलमा उज्वेकिस्तानसँग २–० गोल अन्तरले हारेको थियो । अन्तिम खेलमा ताजकिस्तानलाई १–० ले हराउँदै फाईनल यात्रा तय गरेको थियो ।
प्रतियोगितामा नेपालकी सावित्रा भण्डारीले ५ गोल गरेकी छिन् । पहिलो खेलमा ४ गोल गरेकी उनले अन्तिम खेलमा समेत एक गोल गर्न सफल भइन् ।
नेपालमै आयोजना हुने १३ औं दक्षिण एसियाली खेलकुद (साग)को तयारी लागि नेपाल किर्गीस्तान पुगेको हो ।
