काठमाडौं । राष्ट्रिय फुटबल टिमका मुख्य प्रशिक्षक योहान कालिनले सबै खेलाडीमा कप्तानी जिम्मेवारी खोजिरहेको बताएका छन् ।
विश्वकप छनोटको तयारी स्वरुप नेपालले मलेसियाको सुपर लिग च्याम्पियन जोहारसंग मैत्रीपूर्ण फुटबल खेल्दैछ । नियमित कप्तान विराज महर्जन टिम बाहिर रहेपछि नेपाली फुटबल टिमको नयाँ कप्तान को बन्छ भन्ने जिज्ञासा चुलिएको छ ।
मुख्य प्रशिक्षक कालिनले आफुहरुले नयाँ कप्तानको खोजी गरिहेको भन्दै सो बिषय निश्चित भईनसकेको बताए ।
‘मेरो लागि अहिले यो महत्वपुर्ण छैन । एक जनाले ‘आर्मब्यान्ड’लगाउनेछ । तर हामी २३ खेलाडीनै कप्तान बनाउन चाहन्छौ ।’ उनले भने ।
उनले टिममा रहेका २३ जना खेलाडीनै कप्तान जसरी डटेर खेलेको हेर्न चाहेको समेत बताएका छन् ।
विराज टिम बाहिर रहेको अवस्थामा नेपाली टिमको नेतृत्व किरण चेम्जोङले गर्दै आएका थिए । तर किरण यतिबेला जापानको जे लिगमा ट्रायलमा छन् ।
अनिल गुरुङपछि नेपाली टिमको नेतृत्व सिनियर खेलाडीको रुपमा विराजले गर्दै आएका थिए । उनै अनुपस्थितीमा किरणले नेपाली टिमको कप्तानको जिम्मेवारी पाएका थिए ।
किरणको अनुपस्थितीमा उपकप्तान रहेका बिक्रम लामाले नयाँ कप्तानको जिम्मेवारी पाउन सक्ने सम्भावना छ । विराज, किरण र बिक्रम एन्फा एकेडेमीका एउटै ‘ब्याच’ हुन् ।
मुख्य प्रशिक्षक कालिनले नेपाली टिम मलेसिया उड्नु अघि नयाँ कप्तानको बिषयमा निर्णय गर्नेछन् ।
नेपालले विश्वकप छनोटको दोस्रो चरणमा कुवेतसंग खेल्दै प्रतियोगिताको सुरुवात गर्नेछ । त्यसअघि नेपालले मलेसियन क्लबसंग मैत्रीपुर्ण फुटबल खेल्नेछ ।
ईन्डोनेसियाको लिगमा ब्यस्त भएका कारण रोहित चन्द नेपाली टिममा उपलब्ध हुने छैनन् । किरण समेत जे लिगमा ट्रायलमा व्यस्त छन् । सोही कारण दुई मुख्य खेलाडी बिना नेपालले मलेसियाको भ्रमण गर्नेछ ।
फिटनेसलाई मुख्य खेलाडी छनोटको पहिलो आधार बनाउँदै आएका मुख्य प्रशिक्षक कालिनको टिममा विमल घर्तिमगर, दिनेश राजवंशी र हेमन गुरुङले पुनरागमन गरेका छन् ।
मैत्रीपुर्ण खेलका लागि कालिनले २३ सदस्यीय राष्ट्रिय फुटबल टिमको घोषणा गरिसकेका छन् ।
