एजेन्सी । इन्ग्लिश क्लब म्यानचेस्टर युनाईटेडका मिडफिल्डर पाउल पोग्बामाथि रंगभेदी दुर्व्यवहार गर्नेहरुलाई सामाजिक संजाल ट्वीटरले कारबाही गरेको छ ।
ट्वीटरले एक विज्ञप्ति निकाल्दै पोग्बामाथि दुर्व्यवहार गर्नेहरुको ह्यान्डल पत्ता लागेको र उनीहरुको ट्वीटर ह्यान्डललाई कारबाही गरिएको जनाएको छ । यस्तै ट्वीटरका प्रतिनिधिहरुले खेलाडीलाई ट्वीटरको माध्यमबाट हुने दुर्व्यवहारबारे युनाईटेडका प्रतिनिधिसँग भेट गर्दै छलफल समेत गरेको छ ।
'हामीले सँधै यस ठाउँमा हाम्रा साझेदारहरूसँग स्वस्थ वार्तालाप कायम राख्न चाहन्छौ । हामीलाई थाहा छ कि हामीले आफ्नो प्रयोगकर्ताहरूलाई जोगाउन अझ बढी गर्न आवश्यक छ,' ट्वीटरले भनेको छ, 'रंगभेदी दुर्व्यवहार गर्नेलाई हाम्रो प्लेटफर्ममा कुनै ठाउँ छैन र हामी यसको कडा निन्दा गर्दछौं।'
प्रिमियर लिग अन्तर्गत सोमबार राति भएको खेलमा वुल्भ्सविरुद्ध पेनाल्टीमा गोल गर्न असफल भएपछि ट्वीटर लगायतको सामाजिक संजालमा पोग्बाविरुद्ध धेरै रंगभेदी टिप्पणीहरु आएको थियो । उक्त खेलमा युनाईटेड १-१ गोलको बराबरीमा समेत रोकिएको थियो ।
पोग्बाविरुद्ध दुर्व्यवहार भएपछि चौतर्फी विरोध भएको छ । इंग्ल्याण्ड महिला टिमका प्रशिक्षक फिल नेभिल्सले खेलाडीले सामाजिक संजाललाई बहिस्कार नै गर्नु पर्ने धारणा राखेका छन् ।
यस्तै क्लबले दुर्व्यवहार गर्नेहरुको छानबिन समेत भईरहेको जनाएको छ ।
