काठमाडौं । सन् २०१४ नेपाल क्रिकेटले सदैब सम्झने वर्ष हो, नेपाली क्रिकेटको खास वर्ष हो । किनकी विश्व क्रिकेटमा पाइला राखेको करिब २० वर्षपछि नेपालले आईसीसीको एक ठुलो प्रतियोगिता खेलेको थियो ।
त्यस वर्ष नेपालले बंगलादेशमा भएको आईसीसी टी-ट्वान्टी विश्वकप क्रिकेट खेलेको थियो । र, नेपालले उत्कृष्ट प्रदर्शन समेत गरेको थियो ।
विश्वकप खेल्नु अघिसम्म नेपाली क्रिकेट विश्वमा गुमनाम जस्तै थियो । तर, विश्वकपको सहभागिताले नेपाली क्रिकेट विश्वभर फैलिएको थियो । अझ, भनौ नेपालमा क्रिकेट खेलको लोकप्रियता चुलिएको थियो।
बंगलादेशको विश्वकपपछि नेपालले अन्य संस्करणको विश्वकपमा स्थान बनाउन सकेको छैन । पहिलो सहभागितामा भने नेपालले ३ खेलमा २ जित निकालेको थियो । तर, नेट रनरेटको आधारमा नेपाल अघिल्लो चरणमा पुग्न बन्चित भएको थियो ।
प्रतियोगितामा हङकङ र अफगानिस्तानलाई पराजित गरेको नपालले आयोजक टेस्ट राष्ट्र बंगलादेशसँग पराजित भएको थियो । यस समूहबाट बंगलादेशले अर्को चरणमा स्थान बनाएको थियो ।
विश्वकप खेलेसँगै नेपाली क्रिकेटले ठुलो फड्को मार्ने अनुमान गरिएको थियो । तर, दुर्भाग्य त्यसको केहि वर्ष पछि नेपाल क्रिकेट संघ (क्यान) आईसीसीबाट निलम्बनमा परेको थियो ।
राजनीतिक हस्तक्षेप भएको भन्दै आईसीसीले गरेको निलम्बन तत्काल फुकुवा हुने सम्भावना छैन् ।
बंगलादेश विश्वकपमा नेपालको जर्सी लगाएका कतिपय खेलाडीले क्रिकेट छाडिसकेका छन् । कतिपय खेलाडी विदेश पलायन भएका छन् । केहि खेलाडीले भने देशको जर्सी अझै लगाईरहेका छन् ।
नेपालको विश्वकप क्रिकेटको ऐतिहासिक यात्रामा रहेका क्रिकेट खेलाडीहरु अहिले के गर्दैछन् त ? धेरैको चासोको विषय बनेको छ ।
विश्वकप खेलेका १५ सदस्सीय नेपाली टिमका खेलाडीको अवस्थाबारे तल वर्णन गरिएको छ ।
१. पारस खड्का (कप्तान)
बंगलादेशमा सम्पन्न आईसीसी टी-ट्वान्टी विश्वकपमा नेपालको कप्तानी पारस खड्काले गरेका थिए । कप्तान पारस अझै नेपाली क्रिकेट टिमको कप्तानी गरिरहेका छन् ।
नेपाली क्रिकेटमा उनी एक खम्बा मानिन्छ । उक्त विश्वकपमा कप्तान पारसले ३ खेलमा ८३ रन जोड्नुका साथै १ विकेट हात पारेका थिए ।
२. ज्ञानेन्द्र मल्ल
बंगलादेश विश्वकपमा ज्ञानेन्द्र मल्ल मुख्य खेलाडी थिए । हाल मल्ल नेपाली टोलीका उपकप्तान रहेका छन् । उक्त विश्वकपमा उनले ३ खेलमा ८३ रन बनाएका थिए ।
३. प्रदिप ऐरी
आईसीसी टी-ट्वान्टी विश्वकपमा प्रदिप बेन्चमा रहेका थिए । विकेटकिपरको भूमिका निर्वाह गर्ने प्रदिपको स्थानमा सुबास खकुरेल खेलेका थिए । प्रदिप अहिले राष्ट्रिय टिममा रहेका छन् ।
४. विनोद भण्डारी
विनोद अहिले पनि नेपाली राष्ट्रिय टिमबाट खेल्दै आएका छन् । टी-ट्वान्टी विश्वकपमा उनले ३ खेलमा ५ रन बनाएका थिए ।
५. बसन्त रेग्मी
बंगलादेश विश्वकपमा बसन्त नेपालका मुख्य बलर थिए । बसन्तले उक्त विश्वकपको ३ खेलमा नेपालका लागि सर्वाधिक ५ विकेट हात पारेका थिए । बसन्त अहिले पनि नेपाली राष्ट्रिय टोलीबाट खेलिरहेका छन् ।
६. सोमपाल कामी
सोमपालले बंगलादेश विश्वकपबाटै अन्तराष्ट्रिय क्रिकेटमा डेब्यु गरेका थिए । त्यसपछि उनले पछाडी फर्केर हेर्नु परेको छैन । उनि नेपाली टोलीका नियमित सदस्य हुन् ।
सोमपाल नेपालको भरपर्दा अलराउण्डर हुन् । उक्त विश्वकपमा सोमपालले ३ खेलमा ४ विकेट हात पारेका थिए ।
७. शरद भेषवाकर
शरद नेपाली क्रिकेटका भरपर्दा ब्याट्सम्यान हुन् । शरद नेपाली टोलीका नियमित सदस्य हुन् । उक्त विश्वकपमा उनले ३ खेलमा सर्वाधिक ९१ रन बनाएका थिए ।
८. जितेन्द्र मुखिया
बंगलादेश विश्वकपमा योर्कर किङको उपनाम पाएका मुखिया अहिले नेपाली टोलीमा छैनन् । उक्त विश्वकपमा उनले ३ खेलमा ४ विकेट हात पारेका थिए । अफगानिस्तानविरुद्ध उनी म्यान अफ द म्याच घोषित भएका थिए ।
तर,चोटका कारण मुखिया विश्वकपपछि लामो समय मैदान बाहिर रहे । उनी अहिले घरेलु लिगमा भने मैदान फर्किएका छन् ।
९. सुबास खकुरेल
खकुरेल आईसीसी टी-ट्वान्टी विश्वकपमा अर्धशतक बनाउने एक मात्र खेलाडी हुन् । यस्तै उनी अन्तराष्ट्रिय टी-ट्वान्टीमा अर्धशतक बनाउने पहिलो नेपाली खेलाडी हुन् ।
अफगानिस्तानविरुद्ध विश्व टी-ट्वान्टीमा ५६ रन प्रहार गर्दै खकुरेलले उक्त कीर्तिमान बनाएका थिए । तर, खकुरेल पछिल्लो समय चोटका लागि टिम बाहिर रहेका छन् ।
खकुरेलले अन्तिम पटक सन् २०१८ को एसिया कपमा हङकङविरुद्ध खेलेका थिए ।
१०. सागर पुन
सागर अहिले नेपाली टोलीमा छैनन् । तर, विश्वकपमा उनले ३ खेलमा ३३ रन बनाएका थिए । गत संस्करणको एभरेस्ट प्रिमियर लिगमा चोट लागेका कारण उनी लामो समय मैदान बाहिर रहेका छन् ।
११. शक्ति गौचन
बंगलादेश विश्वकपमा निकै चर्चित गौचनले क्रिकेटबाट सन्यास घोषणा गरिसकेका छन् । नेदरल्याण्डविरुद्ध एकदिवसीय अन्तराष्ट्रिय क्रिकेटमा डेब्यु गर्दै गौचनले सन्यास घोषणा गरेका थिए ।
विश्वकपमा उनले 'शक्ति द पावर' उपनाम पाएका थिए । नेपाली टोलीमा त्यस समयका भरपर्दा स्पिनर गौचनले ३ खेलमा सर्वाधिक ५ विकेट हात पारेका थिए । हङकङविरुद्धको खेलमा उनी म्यान अफ द म्याच घोषित भएका थिए ।
अहिले उनी यू-१९ राष्ट्रिय टोली र घरेलु क्लबमा कन्सल्ट्याण्टका रुपमा काम गर्दै आएका छन् ।
१२. अमृत भट्टराई
विश्वकप टिममा रहेका भट्टराईले मैदान उत्रन भने पाएनन् । हाल उनी अस्ट्रेलियामा रहेका छन् । घुँडाको चोटका कारण लामो समय क्रिकेटबाट टाडा रहेका उनी हाल अस्ट्रेलियाको तास्मेनिया विश्वविद्यालयबाट घरेलु लिग खेल्ने तयारीमा रहेका छन् । यसअघि उनले पर्थबाट एक सिजन खेलेका थिए ।
१३. नरेश बुढाएर
विश्वकप टोलीका सदस्य रहेका बुढाएर हाल क्यानडामा रहेका छन् । नेपालको पूर्व प्रशिक्षक पुबुदु दसनायकेको पहलमा उनी क्यानाडा पुगेका हुन् । उनी दसनायकेको एकेडमीमा क्रिकेट प्रशिक्षण गरिरहेका छन् ।
उक्त विश्वकपमा उनले २ खेलमा २ रन बनाएका थिए ।
१४. राहुल बिश्वकर्मा
राहुल उमेर समूहमा निकै सफल खेलाडी हुन् । दाँया हातले ब्याटिङ गर्ने उनी बाँया हातले स्पिन बलिङ गर्ने क्षमता राख्दथे ।
नेपालले खेलेको एक मात्र विश्वकपको टिममा रहेका उनले मैदान उत्रने मौका भने पाएनन् । निरन्तर राष्ट्रिय टोलीको क्याम्पमा परे पनि अन्तिममा टिमबाट बाहिरिने खेलाडीमा उनी पर्छन ।
अहिले क्रिकेटबाट टाढा रहेका उनी व्यवसाय गर्दै आएका छन् ।
१५. अनिल मण्डल
अघिल्लो क्रममा ब्याटिङ गर्ने अनिल विश्वकप टोलीमा रहेका थिए । तर, उनले मैदान उत्रने मौका पाएनन् ।
राष्ट्रिय टोलीमा नरहेका अनिल अहिले घरेलु लिग खेल्दै आएका छन् । उनले आठौ राष्ट्रिय खेलकुद खेलेका थिए ।
