एजेन्सी । उरुग्वेका स्टार ईडिन्सन काभानीले क्लब सहकर्मी नेयमारले नयाँ सिजनको सुरुवातसंगै पुन चम्किने बताएका छन् । उनले फ्रान्सेली क्लब पीएसजीमा नेयमारका लागि धेरै प्रस्ताव रहेको समेत उल्लेख गरेका छन् ।
ब्राजिली स्टार नेयमार पछिल्लो समय बार्सिलोना फर्कने तयारी गरेका छन् । नेयमारलाई पुरानै क्लबमा फर्काउन बार्सिलोनाले पीएसजीसंग छलफल गरिरहेको छ ।
नेयमार पछिल्लो समय विवादीत बनेका थिए ।
तर काभानीले भने सबै अनुभवले नेयमारलाई भविष्यमा अघि बढ्न सहयोग गर्ने बताउँछन् ।
‘मलाई लाग्छ, सबै चिजले उनलाई व्यक्तिगत रुपमा अगाडी बढ्न नयाँ अनुभव दिएको छ ।’ उनले भनेका छन् ।
‘मलाई लाग्छ, पीएसजीलाई दिन उनीसंग अझ धेरै चिज बाँकी छ । अन्तिम दिनसम्म उनी यहीका खेलाडी हुन् । उनले फुटबललाई समेत धेरै चिज दिन बाँकी छ ।’ उनले उल्लेख गरेका छन् ।
पीएसजी पछिल्लो समय स्टार खेलाडीले क्लब छाड्ने चिन्ताले पिरोलिएको छ । तर काभानीको बिषयमा उसलाई राहत मिलेको छ । अर्का सहकर्मी केलियन एम्बाप्पेले समेत नयाँ सिजनमा क्लब छाडने चर्चा चुलिएको थियो ।
उनले नयाँ चुनौतीको सामना गर्न पेरिस छाड्न चाहेको बताएका थिए । तर उनले भर्खरै मात्र आफ्नो अभिब्यक्ति फिर्ता लिदै माफी मागेका छन् ।
‘महान खेलाडीको रुपमा नेयमार, एम्बाप्पेसंग खेल्दा म निकै आनन्दको महशुश गर्छु ।’ काभानीले भने, ‘तर यो समय भनेको सबै जनालाई जोड्ने चिजको खोजी गर्नु हो । राम्रो टिम बनाउनु हो । कामको लागि राम्रो वातावरण निर्माण गर्नु हो ।’
सन् २०१७ मा नेयमार पीएसजी आएपछि सुरुमा पेनाल्टी प्रहार गर्ने बिषयमा काभानीसंग विवाद बढेको थियो ।
सन् २०१७–१८ को सिजनमा लियोनविरुद्व पेनाल्टी प्रहार गर्ने समय दुवैबीच विवाद देखिएको थियो । त्यसअघि पीएसजीबाट काभानीले पेनाल्टी प्रहार गर्दै आएका थिए । तर विश्व फुटबलको महङ्गा खेलाडीको रुपमा पीएसजी आएपछि नेयमारले आफुले पेनाल्टीको जिम्मेवारी पाउनुपर्ने बताएका थिए ।
‘धेरै बिषयमा हाम्रो बिषयमा कुराकानी हुने गर्छ ।’ काभानी भन्छन्, ‘यो सत्य हो, सुरुवाती केही महिना हामीबीच केही मतभिन्नता रहे । तर विस्तारै सबै चिज राम्रोसंग अघि बढ्यो ।’
‘सामाजिक सञ्जाल र बाहिरी सञ्चारमा यसलाई अतिरञ्जित गर्ने काम भयो । ती सबै चिज सही थिएनन् ।’ उनी भन्छन् ।
