जोटाको सम्झनामा लिभरपुलको जर्सी नम्बर २० रिटायर

काठमाडौं। लिभरपुलले पोर्चुगाली फरवार्ड डिएगो जोटाको सम्मानमा उनको जर्सी नम्बर २० सधैंका लागि अवकाश (रिटायर) गर्ने भएको छ।

यस महिनाको सुरुआतमा आफ्ना दाजु आन्द्रे सिल्भासँग सँगै कार दुर्घटनामा परेर ज्यान गुमाएका जोटाको सम्झनामा क्लबले यो निर्णय गरेको हो।

‘उनकी पत्नी रुटे र परिवारसँग परामर्श गरेपछि क्लबले जोटाको सम्झनामा सबै स्तरमा लिभरपुल महिला टिमदेखि एकेडेमीसम्म यो जर्सी नम्बर सधैंका लागि रिटायर गर्ने निर्णय गरेको छ,’ क्लबले भनेको छ।

जुलाई ३ मा भएको सो दुर्घटनापछि लिभरपुल आइतबार इङ्लिस च्याम्पियनसिप क्लब प्रेस्टनविरुद्ध हुने प्रि-सिजन मैत्रीपूर्ण खेलमार्फत पहिलोपटक प्रतिस्पर्धामा फर्कन लागेको छ।

खेल सुरु हुनु अघि लिभरपुलको प्रसिद्ध गीत ‘यु विल नेभर वाक अलोन’ बजाइनेछ। प्रेस्टन क्लबले आफ्ना दर्शक सामु पुष्पगुच्छ अर्पण गर्नेछ। त्यसपछि एक मिनेट मौन धारण गरिनेछ।

रंगशालाको स्क्रिन र पिच साइडका डिजिटल बोर्डहरूमा जोटाको सम्झनामा डिजिटल श्रद्धाञ्जली प्रदर्शन गरिनेछ। दुबै टोलीका खेलाडीहरूले कालो पट्टी (ब्ल्याक आर्मब्यान्ड) लगाएर खेल्नेछन्।

तीन सन्तानका पिता जोटा आफ्नो प्रेमिका रुटे कार्डोसोसँग दुर्घटनाको ११ दिन अगाडि मात्र विवाह गरेका थिए। स्पेनको उत्तरतर्फ एउटा लाम्बोर्गिनी कारमा यात्रा गरिरहेका बेला तीव्र गतिको कार सडकबाट तल खसेर आगो लागेको थियो। सो दुर्घटनामा उनी र उनका दाजु दुबैको ज्यान गएको थियो।

लिभरपुलका मुख्य प्रशिक्षक आर्ने स्लट र कप्तान भर्जिल भान डाइकसहित क्लबका थुप्रै खेलाडीहरू गत शनिबार जोटाको अन्त्येष्टिमा सहभागी भएका थिए।