चेल्सी र पिएसजीबीचको फाइनल अस्ट्रेलियन रेफ्रीले खेलाउने

काठमाडौं। फिफाले आइतबार बिहान हुने क्लब विश्वकप फाइनल खेलमा अस्ट्रेलियाका अलिरेजा फगानीलाई मुख्य रेफ्रीको जिम्मेवारी दिने निर्णय गरेको छ।

चेल्सी र पेरिस सेन्ट–जर्मेन (पिएजी)बीचको फाइनल खेल आइतबार हुनेछ। ४७ वर्षीय फगानी इरानमा जन्मिएका हुन्। 

तर, अहिले अस्ट्रेलियाबाट रेफ्रि गर्ने गर्छन्। उनले सन् २०१६ को ओलम्पिक फाइनलमा ब्राजिलले जर्मनीलाई पेनाल्टी सुटआउटमा हराएको खेल पनि सञ्चालन गरेका थिए।

यस वर्षको क्लब विश्वकपमा उनले यसअघि पनि मायामी र अल अहलीबीचको उद्घाटन खेल, बायर्न म्युनिख र बोका जुनियर्सबीचको समूह चरण खेल र चेल्सीको पाल्मेइरासमाथिको क्वार्टरफाइनल जितमा रेफ्री गरेका छन्।

फगानीले यसअघि सन् २०१८ र २०२२ का फिफा विश्वकपमा पनि रेफ्रीको भूमिका निभाएका थिए।