काठमाडौँ । नेपाली क्रिकेटको मुख्य कमजोरी के होला ? प्रश्न जो कोहीलाई सोधे पनि पाउने एउटै जवाफ हो, ब्याटिङ । सायदै कसैले यस जवाफमा विमती राख्लान् ।
नेपाली क्रिकेटमा ब्याटिङ मुख्य कमजोरी रहँदै आएको छ । ब्याटिङकै कारण नेपालले थुप्रै खेल हारेको छ । कतिपय खेलमा सामान्य लक्ष्य पछ्याउने क्रममा पराजित भएको ईतिहास छ । कुनै खेलमा लक्ष्यनै थोरै प्रस्तुत गरेका रेकर्ड छन् ।
कुनै टिमको ब्याटिङ नचल्नु सामान्य नै हो । खेल सधैं एकैनास हुँदैन ।
नेपाली राष्ट्रिय टिममा मुख्य ब्याट्सम्यानको रुपमा करिब ६-७ बर्ष अनुभब बटुलेका खेलाडी छन् । केहि नयाँ युवा खेलाडीले उत्कृष्ट प्रदर्शन गर्दै भविष्यमा प्रभाव छाड्ने स्पष्ट संकेत गरेका छन् । तर पनि नेपाली क्रिकेटलाई अघि बढाउन उमेर समुहबाटै खेलाडीको विकास गर्नुपर्ने देखिन्छ ।
नेपाली खेलाडीमा प्रतिभाको कमि छैन । आउने बर्षमा नेपालले आफ्नो ब्याटिङ पक्ष साँच्चिकै बलियो बनाउने हो भने ग्रास रुटदेखि नै सोच्नु पर्ने बेला आएको छ ।
यही सेरोफेरोमा खेलपाटी टिमले यु–१९ राष्ट्रिय क्रिकेट हुँदै सिनियर टोलीमा प्रभाव पार्न सक्ने ५ सम्भावित खेलाडीको सुचि प्रस्तुत गरेको छ ।
१. इशान पाण्डे
स्यांङ्जामा जन्मिए पनि भारतको उत्तराखण्डमा क्रिकेट सिकेका इशान सन् २०१६ को यू–१९ विश्वकपमा नेपालको प्रतिनिधित्व गर्दै बंगालदेश भ्रमण गरेका थिए । प्रतियोगितामा खेल्ने मौका नपाए पनि उनले त्यहाँ राम्रो अनुभब बटुल्ने मौका पाए ।
भारतमा क्रिकेट सिकेका कारण उनीमा छिमेकी देशको क्रिकेटको प्रभाव छ । घरेलु प्रतियोगितामा खासै जम्न नसकेका इशान अन्तिम संस्करणको पीएम कपमा धमाका मचाएका थिए ।
प्रतियोगितामा उनी प्रदेश ३ बाट खेलेका थिए । टिमको नेतृत्व राष्ट्रिय टिमका कप्तान पारस खड्काले गरेका थिए । उनले प्रादेशिक टिमबाट १ सय ८० रन बनाएका थिए । उनी आफ्नो टिमबाट सर्वाधिक रन बनाउने खेलाडी बनेका थिए । उनले ५ खेलमा २ अर्धशतक प्रहार गर्दै प्रतियोगिता अवधिभर सर्वाधिक रन बनाउने खेलाडीको चौथो स्थानमा रहेका थिए । उनी भन्दा अगाडी ६ खेल खेलेका रोहित कुमार पौडेल १ सय ८८, अमित श्रेष्ठ २ सय १० र राजु रिजाल २ सय ६१ रन बनाएका थिए ।
घरेलु प्रतियोगितामा टी–ट्वान्टी फर्म्याटका खेल धेरै हुने गर्छ, सोही कारण इशानलाई खेल्न मुस्किल हुने गर्छ । तर जब लामो फम्र्याटको खेल आउँछ उनको प्रर्दशन साच्चिकै गज्जब हुने गर्छ । इशान भविष्यमा नेपाली क्रिकेटको इनिङ्स उकास्ने खेलाडीको रुपमा प्रयोग हुन सक्छन् ।
२. रित गौतम
रित गौतम नेपाली राष्ट्रिय यू–१९ क्रिकेट टोलीका सदस्य तथा यू–१६ टिमका पुर्व कप्तान हुन् । उनी दुई फरक उमेर समूहको क्रिकेटमा शतक प्रहार गर्ने एक्लो खेलाडी हुन् । रितले सबै प्रतियोगितामा ओपनिङ गर्दै आएका छन् । भर्खरै सकिएको एसीसी यू–१९ इस्टर्न रिजन क्रिकेटमा उनले नेपालका लागि ओपनिङ गर्दै ४ खेलमा १ सय ४१ रन बनाएका थिए ।
सिंगापुरविरुद्द अविजित शतकीय इनिङ्स खेलेका उनी प्रतियोगितामा शतक प्रहार गर्ने एक्ला खेलाडी बनेका थिए । रितले सो प्रतियोगितामा सर्वाधिक रन बनाउने खेलाडीमा चौथो तथा नेपालको दोस्रो खेलाडी बनेका थिए । प्रतियोगितामा रितको औसत ७० दशमलब ५० रहेको थियो । जुन सर्वाधिक थियो ।
त्यस्तै, उनले तेस्रो संस्करणको पीएम कपमा प्रदेश ३ का लागि ओपनिङ गरेका थिए । प्रतियोगितामा सय रन बनाएका उनी टिमका सर्वाधिक रन बनाउने तेस्रो खेलाडी थिए । उनी भन्दा अघि इशान पाण्डे १ सय ८० रन र ज्ञानेन्द्र मल्ल १ सय ४३ रन बनाएका थिए ।
तीन महिना अघि भएको आईसीसी यू–१९ विश्वकप छनोट प्रतियोगितामा समेत रितको प्रदर्शन उत्कृष्ट रहेको थियो । प्रतियोगितामा उनले ३९ को औसतमा १ सय ५६ रन बनाएका थिए । र उनी प्रतियोगितामा सर्वाधिक रन बनाउने खेलाडीको पाँचौं तथा नेपालको दोस्रो स्थानमा रहेका थिए । आवश्यकता अनुसार मैदानमा शानदार प्रदर्शन गर्ने रितको खुबी हो । छोटो लक्ष्य पछ्याउने क्रममा उनी धेरै पटक अविजित फर्कने गर्छन् ।
३. खडक बोहरा
विकेटकिपर ब्याट्सम्यान खडक भर्खरै सकिएको एसीसी यू–१९ इस्टर्न रिजन क्रिकेटमा अन्तराष्ट्रिय खेलमा डेब्यु गरेका हुन् । खडकले पछिल्लो समय घरेलु प्रतियोगितामा उत्कृष्ट प्रदर्शन गर्दै आएका छन् । ओपनिङ ब्याटिङ गर्ने उनी आठौँ राष्ट्रिय खेलकुदमा उत्कृष्ट ब्याट्सम्यान घोषित भएका थिए । साथै तेस्रो संस्करणको पीएम कपमा समेत उनी उदयमान खेलाडी घोषित भएका थिए ।
एसीसी यू–१९ इस्टर्न रिजन क्रिकेटमा रित र पवनले ओपनिङ गरेपछि खडक तेस्रो स्थानमा ब्याटिङ गरेका थिए । चीनविरुद्दको खेलमा ब्याटिङ पालो नआएको उनले सिंगापुरविरुद्द भने शतक बनाउन १० रनले चुकेका थिए । प्रतियोगितामा नेपालबाट खडक सर्वाधिक रन बनाउने तेस्रो खेलाडी हुन् ।
ओपनिङ ब्याटिङ गर्न रुचाउने र घरेलु प्रतियोगितामा सफल रहेका उनी उमेर समुहको क्रिकेटमा छाएका खेलाडी हुन् । उनीमा सिनियर खेलाडीले जस्तै ब्याटिङ गर्ने क्षमता रहेको क्रिकेट जानकार बताउँछन् । उनलाई केही समय यू–१९ राष्ट्रिय टोलीबाट ओपनिङ गराउँदै विकास गर्ने हो भने उनी भविष्यमा सिनियर टोलीबाट ओपनिङ गर्न सक्ने क्षमता राख्छन् ।
४. बिशाल बिक्रम केसी
थाइल्याण्डमा सम्पन्न एसीसी यू–१६ पूर्वी क्षेत्रिय क्रिकेट प्रतियोगितामा नेपालका कप्तान बिशाल बिक्रम केसी उत्कृष्ट खेलाडी घोषित भएका थिए ।
नेपाललाई उपाधि दिलाउन सफल कप्तान बिशाल ’प्लेयर अफ दि टुर्नामेन्ट’ चुनिएका हुन् । फाइनलमा मलेसियालाई ५९ रनले पराजित गर्दै नेपालले लगातार दोस्रो पटक उपाधि उचाल्न सफल भएको थियो । बिशालले प्रतियोगितामा ५ खेलमा ९३ रन बनाउदा ३ विकेट हात पर्न सफल भएका थिए ।
केही समय अघि सकिएको एसीसी यू–१९ इस्टर्न रिजन क्रिकेटमा यू–१९ टोलीमा उनले डेब्यु गरेका थिए । च्याम्पियन नेपाली टोलीबाट उनले अन्य खेल खेल्ने मौका भने पाएनन् ।
बिशालले धेरै खेल खेल्ने अवसर नपाएपनि उनको स्तर कुनै ब्यवसायिक खेलाडीको भन्दा कम देखिंदैन । उनले हरेक खेलमा स्थिर प्रदर्शन देखाउने गरेका छन् ।
५. हरी बहादुर चौहान
नेपालको उदाउँदो खेलाडीको सुचिमा पर्ने खेलाडी हुन्, हरि । दोस्रो संस्करणको पीएम कपमा कीर्तिमानी प्रदर्शन गरेपछि उनले पछाडी फर्केर हेर्न परेको छैन । प्रदेश ४ बाट खेलेका उनले प्रदेश १ विरुद्दको खेलमा शतक सहित ह्याट्रिक विकेट लिएका थिए । जुन घरेलु प्रतियोगिताको दुर्लभ रेकर्ड हो ।
हरिले तेस्रो संस्करणको पीएम कपमा त्रिभुवन आर्मीबाट खेल्दै प्रतियोगिता भर १ सय ५४ रन बनाएका थिए । उनी प्रतियोगितामा सर्वाधिक रन बनाउने खेलाडीको सातौ स्थानमा रहेका थिए । र आर्मीबाट सर्वाधिक रन बनाउने चौथो खेलाडी बनेका थिए ।
सन् २०१९ को आईसीसी यू–१९ विश्वकप छनोट अन्तर्गत युएईविरुद्दको खेलमा डेब्यु गर्दै उनले अविजित ७४ बलमा ६७ रन बनाएका थिए ।
हरिले छोटो समयमा राम्रो खेलाडीको परिचय दिएका छन् । उनी भविष्यमा नेपालका लागि मध्य क्रमको ब्याटिङ सम्हाल्ने क्षमता राख्दछन् ।
