काठमाडौं । नेपालमा आयोजना हुने १३ औं दक्षिण एसियाली खेलकुद प्रतियोगिता (साग) का लागि राष्ट्रिय महिला फुटबल टिमले प्रारम्भिक प्रशिक्षण सुरु गरेको छ ।
एन्फा कम्प्लेक्स सातदोबाटोमा महिला फुटबल टिमले आज (आईतबार) बाट साग लक्षित प्रशिक्षण सुरु गरेको हो ।
महिला टिमले हरेक दिन अपरान्ह सागको प्रशिक्षण गर्नेछ । मुख्य प्रशिक्षक हरि खड्काले टिमको तयारी साँझ ५ बजेपछि सुरु हुने खेलपाटीलाई बताएका छन् ।
सागको तयारी लागि एन्फाले पहिलो चरणमा ४२ खेलाडीलाई प्रारम्भिक प्रशिक्षणमा बोलाएको छ । पहिलो दिन केही खेलाडी भने अनुपस्थित थिए ।
साग खेलकुद मंसिर १५ देखि २५ सम्म नेपालमा आयोजना हुदैछ ।
मुख्य प्रशिक्षक खड्काले ८ नयाँ अनुहारलाई प्रारम्भिक टिममा बोलाएका छन् ।
झापाकी सम्झना लावती, काठमाडौंकी प्रिति राई र मनिषा थापा तथा रौतहटकी रोजिना श्रेष्ठ, रेविका राई, सलोनी राना मगर, सविता राना मगर र मनिषा रावत पहिलो पटक राष्ट्रिय टिमको प्रारम्भिक टिममा बोलाईएका हुन् ।
सागको तयारी लागि विभागीय टिम एपीएफ र आर्मीबाट सर्वाधिक १२ जना खेलाडी परेका छन् । त्यस्तै रौतहटबाट ८, पुलिसबाट ७, काठमाडौंबाट २ र झापाबाट १ खेलाडी सुरुवाती प्रशिक्षणमा बोलाईएका छन् ।
एपीएफबाट एन्जिला तुम्बाप्पो सुब्बा, निशा थोकर, सरु लिम्ब, मञ्जली कुमारी योन्जन, रेखा पौडेल, हिरा कुमारी भुजेल, गिता राना, मनमाया लिम्बु, रेनुका नगरकोटी, अनिता बस्नेत, सावित्रा भण्डारी र अनिता के सी रहेका छन् ।
आर्मीबाट अन्जना राना मगर, पुजा राना, विमला विश्वकर्मा, पुनम जर्घा मगर, सुनिता चौधरी, कविता धिमाल, इन्दिरा राई, बिमला चौधरी, सर्मिला थापा, दिपा राई र कृष्णा खत्री रहेका छन् ।
यस्तै रौतहटबाट समिक्षा घिमिरे, वसन्ती नाथ घिमिरे, रश्मी कुमारी घिसिङ, मनिषा रावत, सविता नाथ मगर, सलोनी राना मगर, रेविका राई र रोजिना श्रेष्ठ छन् ।
पुलिसबाट निरु थापा, दिपा न्यौपाने, उषा नाथ, घिम कुमारी गुरुङ्ग, अमृता जैसी, सृजना खड्का र निर्मला बिश्वकर्मा रहेका छन् ।
काठमाडौंबाट मनिषा थापा र प्रिति राई रहँदा झापाबाट सम्झना लावती रहेका छन् ।
नेपालमै आयोजना हुने सागको महिला फुटबल पोखरामा हुने बताईएको छ ।
एन्फाले सागका लागि मुख्य प्रशिक्षकमा हरि खड्का, सहायक प्रशिक्षकमा अरुणा गुरुङ र गोलरक्षक प्रशिक्षकमा अस्मिता खवासलाई जिम्मेवारी दिएको छ ।
