एजेन्सी । म्यानचेष्टर सिटीका फरवार्ड रहिम स्टर्लिङले पुर्व क्लब लिभरपुलले च्याम्पियन्स लिग जित्दा खुसी लागेको बताएका छन् ।
२४ बर्षका सिटी फरवार्डले आफुहरुका लागि प्रिमियर लिगको उपाधि सबै भन्दा महत्वपुर्ण रहेको समेत बताए ।
ईङ्ल्याण्डका अन्तराष्ट्रिय खेलाडीले केही जटिल परिस्थितीमा सन् २०१५ मा लिभरपुल छाड्ने निर्णय गरेका थिए ।
‘म साच्चिकै निकै खुसी छु । च्याम्पियन्स लिगको उपाधि उचाल्ने केही खेलाडीका लागि खुसी छु ।’ उनले भनेका छन् ।
‘च्याम्पियन्स लिग एक क्लबको रुपमा धेरै ठुलो उपाधि हो । तर हाम्रो लागि प्रिमियर लिगको उपाधि महत्वपुर्ण छ । आगामी सिजनमा समेत यहीनै हाम्रो मुख्य उद्वेश्य हुनेछ ।’ उनले थपे ।
च्याम्पियन्स लिग जित्नु राम्रो हो । तर हामी सबै भन्दा महत्वपुर्ण रुपमा लिग जित्न चाहन्छौ ।’ स्टर्लिङले क्लबको उद्वेश्य प्रष्ट पारे ।
‘प्रिमियर लिग हाम्रा लागि सबै चिज हो । हरेक हप्ताको खेल, हरेक दिनको अभ्यास । च्याम्पियन्स लिगलाई मानिसहरु प्रतिष्ठित प्रतियोगिता भन्छन् । तर प्रिमियर लिगमा हरेक हप्ता तपाई नयाँ स्थानमा पुग्नु हुन्छ । तपाई कठिन स्थानमा समेत जान सक्नु हुन्छ ।’ उनले भने ।
सिटीले गत सिजन प्रिमियर लिगको उपाधि मात्र एक अंक अगाडी रहेर जितेको थियो । उसले ९८ अंक बटुलेको थियो भने दोस्रो स्थानको लिभरपुलले ९७ अंक जोडेको थियो । यता लिभरपुलले टोेटेनहमलाई २–० ले हराउँदै छैटौ पटक युरोपियन च्याम्पियन्स लिगको उपाधि जितेको थियो ।
लिभरपुल र सिटी अर्को हप्ता कम्युनिटी शिल्डमा भिड्दैछन् । सिटीले अगष्ट १० मा वेस्ट ह्यामविरुद्व खेल्दै नयाँ सिजनको सुरुवात गर्दैछ ।
स्टर्लिङले लिभरपुलबाट सन् २०१२ देखि २०१५ सम्म खेलेका थिए । उनले गत सिजन निकै उत्कृष्ट रुपमा बिताए । उनले क्लब र देशका लागि ३१ गाेल गरेका थिए ।
उनले अगामी सिजनमा आफुहरुले थप कडा मेहनत गर्ने बताएका छन् ।
उनी भन्छन्, ‘नयाँ सिजन अघिल्लो भन्दा अझै कडा हुनेछ । लगातार तीन पटक जित्नु निकै चुनौतीपुर्ण समेत छ । तर हामी यसका लागि तयार छौ ।’
