एजेन्सी । प्रिमियर लिग क्लब टोटेनहमले अर्जेन्टिनी फरवार्ड पाउलो डिबालालाई अनुबन्धनका लागि ठुलो रकम खर्चन तयार देखिएको छ । पछिल्लो सिजन च्याम्पियन्स लिगको फाईनल खेलेको टोटेनहमले उपाधिमा लक्ष्य केन्द्रित गर्दै ठुलो रकममा डिबाला भित्राउन प्रस्ताव अघि सारेको हो ।
टोटेनहमले औपचारिक रुपमा ईटालियन महारथी युभेन्ट्ससंग डिबालाको बिषयमा छलफल अघि बढाएको छ । उसले अर्जेन्टिनी फरवार्डका लागि कीर्तिमानी मुल्य तिर्न तयार देखिएको छ ।
पछिल्ला बर्षमा कुनै ठुला उपाधि जित्न नसकेको टोटेनहमका प्रशिक्षक मौरिसियो पोचेटिनो समेत केही ठुला खेलाडी क्लबमा अनुबन्धन गर्न चाहन्छन् । सोही कारण टोटेनहमले डिबालालाई मुख्य खेलाडीको रुपमा अनुबन्धन गर्न नजर डुलाएको हो ।
नर्थ लण्डन क्लब डिबालाकालागि ८० मिलियन पाउण्ड तिर्न तयार देखिएको छ । अर्जेन्टिनाका खेलाडी डिबाला विश्व फुटबलका उत्कृष्ट फरवार्ड मानिन्छन् ।
क्रिस्टियानो रोनाल्डो युभेन्ट्स पुगेपछि डिबालाको प्रर्दशन खासै माथि उठ्न सकेको छैन । उनले गत सिजन मात्र १० गोल गरेका थिए ।
टोटेनहमले नयाँ सिजनका लागि लियोनबाट टेन्गे डोम्बेलेलाई ६५ मिलियन पाउण्डमा अनुबन्धन गरेको छ । सोही कारण टोटेनहम डिबालाका लागि गम्भिर प्रस्ताव सहित अघि बढेको छ ।
फरवार्ड लाईनका ह्यारी केनलाई समेत अग्रपङ्तीमा सहयोग गर्न डिबाला उपयोगी हुने टोटेनहमको बुझाई छ ।
गत बर्षको फेब्रुअरीमा टोटनहमले च्याम्पियन्स लिगको अन्तिम १६ को खेलमा युभेन्ट्ससंग प्रतिस्पर्धा गरेको थियो । 'सधै विश्वका उत्कृष्टविरुद्व खेल्दा राम्रो अनुभव हुन्छ ।' पोचिटिनोले भनेका थिए, 'उनी बिशेष किसिमका प्रतिभावान छन् ।'
'उनलाई मैदानमा देख्दा धेरै खुसी लाग्छ । उनले खेलमा केही समस्या पनि खडा गर्छन् ।' उनले भने । सो खेलमा युभेन्ट्स २–१ ले अघि बढेको थियो । जसमा डिबालाले विजयी गोल गरेका थिए ।
