काठमाडौं । नेपालमा आयोजना भएको पाँचौ संस्करणको महिला साफ फुटबलको उपविजेता बनेको नेपाली राष्ट्रिय महिला फुटबल टोलीलाई विराटनगर महानगरपालिकाले नगदसहित सम्मानित गरेको छ ।
विराटनगरमा सोमबार आयोजित एक कार्यक्रममा विराटनगर महानगरले साफ उपविजेता टोलीलाई जनही ५० हजार नगदले सम्मानित गरेको हो । सम्मानित हुनेमा २० खेलाडी, प्रशिक्षक र अफिसियल रहेका छन् ।
विराटनगरमा सम्पन्न प्रतियोगितामा नेपाल फाइनलमा भारतसँग पराजित भएको थियो । तरपनि, महानगरपालिकाले उपविजेता बनेको नेपाली टोलीलाई जनही ५० हजार दिने निर्णय गरेको थियो ।
यस्तै नेपाली टोलीलाई मंगलबार प्रदेश नम्बर एक सरकारले जनही १ लाख नगदले पुरस्कृत गर्दैछ । प्रदेश सरकारले साग जितेको खण्डमा महिला टिमका सदस्यलाई जनही २ लाख दिने घोषणा गरेको थियो । तर, उपविजेता बनेपछि प्रदेश सरकारले एक एक लाख दिन लागेको हो ।
त्यस्तै उपविजेता नेपाली टोलीलाई बुधबार सरकारले नगदसहित सम्मान गर्दैछ । युवा तथा खेलकुद मन्त्रालयले नेपाली टोलीको २० सदसीय खेलाडी र एक प्रशिक्षकलाई जनही ३२ हजारसहित सम्मान गर्ने जनाएको छ ।
