एजेन्सी । लण्डन क्लब चेल्सीको १० नम्बरको जर्सी ब्राजिली स्टार विलियनले लगाउने भएका छन् ।
स्टार खेलाडी हजार्ड नयाँ सिजनका लागि रियल मड्रिडमा अनुबन्धन भएपछि चेल्सीमा १० नम्बरको हकदार को भन्ने कौतुहलता थियो । लण्डन क्लब चेल्सीमा हजार्डले १० नम्बरको जर्सी लगाउने गरेका थिए ।
अब ब्राजिली स्टार विलियनले चेल्सीमा हजार्डले लगाउने जर्सी लगाउने पक्का भएको छ ।
‘क्लबले १० नम्बरको जर्सी अर्को सिजनका लागि मलाई दिने निर्णय गरेको छ ।’ विलियनले भनेका छन् ।
चेल्सीले विलियनलाई १० नम्बर जर्सीका लागि प्रस्ताव गरेको थियो । उनले प्रस्ताव स्विकार गर्दै लण्डन क्लबमै करियर अघि बढाउन चाहेका छन् ।
विलियनले कोपा अमेरिकामा समेत १० नम्बरको जर्सी लगाएर मैदान उत्रिएका थिए । मुख्य खेलाडी नेयमार चोटका कारण प्रतियोगिता गुमाउने भएपछि विलियनले नेयमारले लगाउने १० नम्बरको जर्सी पाएका थिए ।
विलियनले यसअघि शख्तर डोनेत्स्कमा समेत १० नम्बरको जर्सीमा खेलेका थिए । लण्डन क्लबका आक्रमक मिडफिल्डर विलियनको नयाँ गन्तव्यको बिषयमा विभिन्न आशंका उब्जिएको थियो ।
अब उनी चेल्सीमै बाँकी करियर अघि बढाउने बिषयमा सहमत भएका छन् ।
