काठमाडौं । आईसीसी टी-ट्वान्टी विश्वकप छनोट अन्तर्गतको एसिया फाइनलमा प्रतिस्पर्धा गर्न नेपाली राष्ट्रिय क्रिकेट टोली अहिले सिंगापुरमा रहेको छ । एसिया फाइनल प्रतियोगिता भोली (सोमबार) बाट सुरु हुँदैछ ।
एसिया फाइनलमा नेपालसहित आयोजक सिंगापुर, मलेसिया, कतार र कुवेत रहेका छन् । फाइनलको विजेता टोलीले विश्वकपको ग्लोबल छनोटमा स्थान बनाउने छन् ।
नेपालले कतारसँग खेल्दै प्रतियोगिताको सुरुवात गर्नेछ । नेपाल र कतारबीचको खेल मंगलबार हुनेछ । यस्तै नेपालले दोस्रो खेलमा मलेसियासँग बुधबार, कुवेतसँग शनिबार र अर्को आइतबार नेपालले सिंगापुरसँग खेल्नेछ ।
मलेसियामा टी-ट्वान्टी सिरिज र अभ्यास गरेको नेपाल उपाधि जित्दै ग्लोबल छनोटमा पुग्न चाहन्छ । तर, उपाधि जित्न नेपाललाई चुनौती धेरै छ ।
समग्रमा हेर्दा नेपाल प्रतियोगिताको उपाधि दाबेदार टिम हो । उक्त प्रतियोगितामा एकदिवसीय मान्यता प्राप्त गर्ने एक मात्र राष्ट्र नेपाल हो । त्यसैले नेपालले उपाधि जित्ने लक्ष्य बनाएको छ ।
सिंगापुरमा रहेको नेपाली टोलीले उपाधि जित्ने आधार धेरै छन् । नेपालले उपाधि जित्ने मुख्य ३ आधार यस प्रकार रहेको छ ।
१. कमजोर प्रतिद्वन्दी
एसिया फाइनलमा नेपाल उपाधि दाबेदार टिम हो । यस फाइनल खेल्ने पाँच राष्ट्र मध्ये नेपाल मात्र एकदिवसीय मान्यता प्राप्त राष्ट्र हो ।
अन्तराष्ट्रिय क्रिकेट परिषद (आईसीसी) को टी-ट्वान्टी वरियता हेर्ने हो भने पनि नेपाल अन्य राष्ट्रभन्दा निकै माथि छ । आईसीसीको वरियतामा नेपाल ११ औं स्थानमा रहेको छ ।
नेपालपछि वरियतामा कतार २१ औं स्थानमा छ । यस्तै आयोजक सिंगापुर २३ औं, कुवेत २८ औं र मलेसिया ३५ औं स्थानमा रहेका छन् ।
आईसीसीको वरियता हेर्दा प्रतियोगितामा नेपाल हाबी हुने देखिन्छ । प्रतियोगितामा सिंगापुर र मलेसियाले नेपाललाई केहि चुनैती दिन सक्नेछन । तर, पछिल्लो भेटमा नेपाल हाबी हुँदै आएको कारण नेपालले जित निकाल्नेमा सबै विश्वस्त रहेका छन् ।
२. खेलाडीको उच्च मनोबल
सिंगापुर जानु अघि मलेसियामा नेपाली टोलीले घरेलु टोलीसँगको दुई खेलको टी-ट्वान्टी क्रिकेट सिरिजमा 'क्लिन स्विप' गरेको थियो । यस्तै पछिल्लो ५ खेलमा नेपाल लगातार ४ जित हात पारेको छ । गत माघमा नेपालले युएईसँग ३ खेलको टी-ट्वान्टी सिरिजमा २ जित हात पार्दै ऐतिहासिक सफलता हात पारेको थियो ।
करिब ५ महिनाको अन्तरालमा अन्तराष्ट्रिय खेल खेलेका नेपाली खेलाडीहरु घरेलु टी-ट्वान्टी प्रतियोगितामा भने निकै व्यस्त रहेका थिए । लगातार टी-ट्वान्टी क्रिकेटमा व्यस्त रहेका नेपाली खेलाडीको मनोबल पक्कै पनि उच्च रहेको छ ।
३. कप्तान पारसको लय
नेपालको ब्याटिङमा सधै ओपनरको अभाब देखिदै आएको छ । जसको कारण मलेसिया भ्रमणमा कप्तान पारस खड्काले ओपनिङको जिम्मा लिएका थिए र, कप्तान सफल पनि भए ।
कप्तान पारसले २ खेलमा १ सय ९ रन बनाएर सिरिजमा सर्वाधिक रन बनाउने खेलाडी बने । पहिलो खेलमा विस्फोटक ब्याटिङ गरेका उनले अविजित ८६ रन बनाएका थिए । पारस टी-ट्वान्टी अन्तराष्ट्रियमा दुई अर्धशतक बनाउने पहिलो नेपाली खेलाडी समेत बनेका थिए ।
यसअघि युएई भ्रमणमा पारसले ३ खेलमा १ सय १५ रन बनाउँदै सिरिजमा सर्वाधिक रन बनाउने खेलाडी बनेका थिए । अन्तराष्ट्रिय टी-ट्वान्टी खेलमा पारस उत्कृष्ट लयमा देखिएका छन् । यस्तै कप्तान पारस एक्लैले नेपाललाई खेल जिताउने क्षमता राख्दछन् ।
