एजेन्सी । विश्वकप विजेता इंग्ल्याण्डले व्यवसायिक खेलाडीलाई आफ्नो देशमा बस्नका लागि सहज वातावरण बनाउँदै आएको छ । क्रिकेटमा देखिने खेलाडी संख्याले यसको पुष्टि हुन्छ ।
घरेलु मैदानमा गत साता सम्पन्न एकदिवसीय विश्वकप जित्दा इंग्ल्याण्डको टोलीमा ७ खेलाडी अन्य देशमा जन्मिएका थिए ।
पूर्व खेलाडी जोनाथन ट्रोट, केभिन पिटरसन देखि अहिले टिममा रहेका इयान मोर्गन, बेन स्टोक्स, जोफ्रा आर्चर लगायतका खेलाडी इंग्ल्याण्डका होइनन् । उनीहरु अर्कै देशमा जन्मिए पछि परिवारसंगै इंग्ल्याण्ड आएका थिए ।
अन्य राष्ट्रमा जन्मिएर इंग्ल्याण्डबाट खेलेका खेलाडीको सूची धेरै छ । कतिपय खेलाडीले इंग्ल्याण्डको कप्तानी नै गरेका छन् ।
अन्य देशमा जन्मिएर इंग्ल्याण्ड क्रिकेट टिमको कप्तानी गरेका पाँच खेलाडीको चर्चा हामी गर्दैछौँ ।
१. इयान मोर्गन
इयान मोर्गन क्रिकेटको जननी मानिने इंग्ल्याण्डलाई विश्वकप दिलाउन सफल कप्तान हुन् । विश्वकप सुरु भएको ४४ बर्षको पछि इंग्ल्याण्डलाई उपाधि दिलाउन सफल कप्तान मोर्गन भने आयरल्याण्डमा जन्मिएका हुन् ।
करिब १३ बर्ष क्रिकेटमा बिताईसकेका उनले इंग्ल्याण्ड क्रिकेटमा भने सन् २००९ मा डेब्यु गरेका थिए । सन् २००९ को टी-ट्वान्टी विश्वकपमा पहिलो पटक मोर्गनले इंग्ल्याण्डबाट खेलेका थिए ।
यसअघि उनले आयरल्याण्डबाट अन्तराष्ट्रिय खेल खेल्दै आएका थिए । सन् २०१५ को विश्वकपबाट इंग्ल्याण्डको कप्तानी सुरु गरेका मोर्गन इंग्ल्याण्डका लागि एकदिवसीयमा सर्वाधिक खेल खेल्ने कप्तान हुन् ।
२. केभिन पिटरसन
पूर्व ब्याट्सम्यान केभिन पिटरसन इंग्ल्याण्डले पाएको सफल ब्याट्सम्यान मध्ये एक हुन् । पिटरसन एक्लैले खेललाई आफ्नो पक्षमा फर्काउन सक्ने क्षमता राख्दथे ।
पिटरसनको जन्म भने दक्षिण अफ्रिकामा भएको थियो । उनी युवा अवस्थामा दक्षिण अफ्रिकाबाट इंग्ल्याण्ड सरेका थिए ।
पिटरसनले सन् २००४ मा जिम्बावेविरुद्ध एकदिवसीय खेल खेल्दै डेब्यु गरेका थिए । अन्तराष्ट्रिय खेलमा डेब्यु गरेको ३ बर्षपछि उनले इंग्ल्याण्डको कप्तानी सम्हालेका थिए ।
उनको कप्तानीमा इंग्ल्याण्डले १२ एकदिवसीय र ३ टेष्ट खेलेको छ । जसमा इंग्ल्याण्डले ५ खेलमा जित हात पारेको थियो ।
३. नासिर हुसेन
इंग्ल्याण्डका पूर्व कप्तान नासिर हुसेनले विश्व क्रिकेटमा छुट्टै छाप छाडेका छन् । इंग्ल्याण्डका लागि उनले ८ हजार बढी रन बनाएका छन् । तर, उनको जन्म भने भारतमा भएको थियो ।
भारतको चेन्नईमा जन्मिएका हुसेन ७ वर्षको उमेरमा परिवारसहित इंग्ल्याण्ड गएका थिए । हाल क्रिकेट कमेन्ट्रीमा व्यस्त रहेका व्यस्त रहेका छन् ।
नासिरलाई विश्व क्रिकेटले निकै मेहनती खेलाडीको रुपमा हेर्ने गर्छ । उनलाई क्रिकेट लेजेण्ड सचिन तेन्दुलकरले उत्कृष्ट रणनीतिकर्ताको उपनाम दिएका छन् । उनको कप्तानीमा इंग्ल्याण्डले लगातार ४ टेष्ट सिरिज जित्न सफल भएको थियो ।
इंग्ल्याण्डको आधुनिक क्रिकेटलाई उचाइमा पुर्याउन उनको ठुलो योगदान रहेको छ । उनी विश्वको पुरानो क्रिकेट क्लब एमसीसीका सम्मानित सदस्य समेत हुन् ।
४. एण्ड्रिउ स्ट्रस
केभिन पिटरसन जस्तै एण्ड्रिउ स्ट्रसको जन्म दक्षिण अफ्रिकामा भएको थियो र क्रिकेट करियर भने उनले इंग्ल्याण्डमा समापन गरे । फस्ट क्लास र लिस्ट 'ए' क्रिकेटमा सन् १९९७-९८ मा डेब्यु गरेका उनले अन्तराष्ट्रिय क्रिकेट खेल्न ६ वर्ष कुर्नु परेको थियो ।
सन् २००३ को विश्वकप पछि उनले श्रीलंकाविरुद्ध एकदिवसीय क्रिकेटबाट डेब्यु गरेका थिए । लगत्तै उनले टेष्टमा डेब्यु गर्दै इंग्ल्याण्डका लागि महत्पूर्ण खेलाडीको रुपमा आफुलाई उभ्याएका थिए ।
सन् २००९ मा केभिनले कप्तानी छाडेपछि एण्ड्रिउले इंग्ल्याण्डको कप्तानीको जिम्मा पाएका थिए । ३ वर्ष कप्तानी गरेका उनले इंग्ल्याण्डले ३ टेष्ट सिरिज जितेको थियो । कप्तानको रुपमा खासै सम्झन लायक प्रदर्शन नगेरे पनि उनको कप्तानीमा ४५ प्रतिशत जित हात पारेको थियो ।
५. आडम होल्लिओक
इंग्ल्याण्डका पूर्व कप्तान आडम होल्लिओकको जन्म अष्ट्रेलियामा भएको थियो । उनले सन् १९९६ मा एकदिवसीय क्रिकेटमा डेब्यु गरेका थिए । लगत्तै अर्को वर्ष उनले एसेसमा डेब्यु गरेका थिए । तर,उनको क्रिकेटिङ करियर भने ४ टेष्ट र ३५ एकदिवसीय मात्र रहयो ।
छोटो क्रिकेट करियरमा पनि उनले इंग्ल्याण्डको कप्तानी गर्ने मौका पाएका थिए । सन् १९९७ देखि १९९९ सम्म उनले १४ एकदिवसीय क्रिकेटमा इंग्ल्याण्डको कप्तानी गरेका थिए । उनको कप्तानीमा इंग्ल्याण्डले ६ खेलमा जित हात पारेको थियो ।
-1746894755.jpeg)
