काठमाडौं । हाम्रोतिर चेल्सीको लोकप्रियता ह्वाट्टै बढ्दा त्यसका स्टार खेलाडी थिए, फ्रान्क लाम्पार्ड । चेल्सी मन पराउनेहरूमध्ये धेरै उनकै कारणले पनि क्लबका प्रशंसक भएका हुन सक्छन् । कोही खेलाडीको खेल मन परेपछि उनले खेल्ने टिमनै पनि मन पर्ने पनि हुन्छ । जे होस, एउटा तथ्य के निश्चित छ भने नेपालमै उनलाई मन पराउने फुटबल प्रशंसक धेरै छन् । तिनै मन पराउनेको मन फेरि दंग भएको हुनु पर्छ, प्रशिक्षकका रूपमा चेल्सीको उनको आगमनले ।
कुनै असहमती रहने छैन, यदी कसैले उनलाई चेल्सीका 'लेजेन्ड' हुन भन्दा । त्यसो त एउटा तस्बिर भर्खर खुबै भाइरल भएको छ, जसमा कोही एक जना चेल्सी समर्थकले लाम्पार्ड लेजेन्ड होइनन, बरू गद्दार हुन भन्ने पोस्टर देखाइरहेका थिए ।
खासमा त्यो केही क्षणको बहकिएको भावना मात्र थियो होला । सन् २००१ देखि २०१४ सम्म लाम्पार्डले आफ्नो खेल जीवनको उत्कृष्ट क्षण सबै चेल्सीका लागि सुम्पे । त्यसयता उनी म्यानचेस्टर सिटी गएको त पेन्सन पकाउन मात्रै थियो ।
खासमा यी लाम्पार्ड अर्को लन्डन क्लब वेस्ट ह्याम्पका उत्पादन हुन् । त्यहाँकै एकेडेमीमा हुर्के बढेका लाम्पार्डले पनि सिनियर स्तरमा पनि खेले । उनको पूरा परिवार नै वेस्ट ह्याम्प समर्थक हुन् । अझ बुबा त वेस्ट ह्याम्पका खेलाडी पनि भए, प्रशिक्षक पनि भए । छोरा लाम्पार्ड हुर्कदै गर्दा बुबा लाम्पार्ड वेस्ट ह्याम्पमा सहायक प्रशिक्षक थिए । मिडफिल्डमा आफ्नो उपयोगिता सावित गरेपछि उनी चेल्सीको नजरमा परिहाले, बाँकी त अब इतिहास नै भयो ।
अहिले लाम्पार्डको बाक्लो चर्चा हुनुको कारण चेल्सीमा उनको पुर्नआगमनका कारण हो, त्यो पनि प्रशिक्षकका रूपमा । खेल्न छाडेयता उनको रूचि टिम व्यवस्थापनमा रह्यो । पोहोरको सिजन उनी च्याम्पियनसिप टिम डर्बीमा थिए । डर्बीले बढुवाका लागि प्ले अफ पनि खेलेको थियो, तर प्रिमियर लिगमा बढुवा हुन सकेन् । भाग्य भनेको यही त हो, डर्बी प्रिमियर लिगमा नउक्लेर के भयो त ? लाम्पार्डले एकै पल्ट प्रिमियर लिगमा छलाङ मार्न पाए ।
डर्बीका लागि बढुवाको प्ले अफ खेल्न पाउनु राम्रै हो । त्यसका लागि लाम्पार्डलाई जस दिनै पर्छ । तर एउटा तथ्यमा भने के ठूलो अन्तर देखिन्छ भने च्याम्पियनसिप टिम सम्हाल्नु एउटा हो, प्रिमियर लिग टिम सम्हाल्नु अर्कै हो । धेरै फरक छ ।
यस्तोमा प्रश्न खडा हुन्छ, कतै लाम्पार्डले धेरै छिटो चेल्सी सम्हालने अवसर पाएका त होइनन ? चेल्सीको प्रदर्शन खराव भयो भने कहीं कतै लाम्पार्डको लेजेन्ड छविमा दाग लाग्ने त होइन ?
चेल्सीका रुसी मानिक रोमन अब्रामोभिच आफ्नो प्रशिक्षकलाई दया शून्य व्यवहार गर्न माहिर छन् । नतिजामा केही तलमाथि भयो भने प्रशिक्षक वर्खास्त गर्न उनलाई खासै केही पनि लाग्दैन, भलै त्यसका लागि करोडौं डलरको क्षतिपूर्ति तिर्नु पर्ने हुन्छ ।
स्टानफोर्ड ब्रिजको स्वामित्व किनेयता यी धनादयले १६ वर्षमा ११ प्रशिक्षक अनुबन्ध गरे, अनि लगभग त्यत्तिकै सख्यामा बर्खास्त पनि गरे । लाम्पार्ड उनको प्रशिक्षक नम्बर एक दर्जन हुन् ।
अब्रामोभिचले लाम्पार्डलाई नियुक्त गर्नुमा क्लब समर्थकको दृष्टिकोणबाट रोमान्टिक दृष्टिकोण पनि छ । आखिरमा लाम्पार्ड आए भनेपछि क्लबका समर्थक त्यस्तै पनि मख्ख परेका छन् । यो अनुबन्ध तीन वर्षको छ । तर यहींनिर फुटबल व्यवस्थापनको दृष्टिकोणले हेर्दा भने लाम्पार्डलाई नियुक्त गर्ने क्रममा यी रुसी धनाद्यले खुबै ठूलो जोखिम उठाएका छन् । यति ठूलो जोखिम उनले यसअघि अरू कोही प्रशिक्षक नियुक्त गर्दा पनि लिएका थिएनन् ।
यसअघि अब्रामोभिचले जति पनि प्रशिक्षक लिए, ती सबै अनुभवी थिए, त्यस अगाडि नै सफल भइसकेका थिए । लगभग सबैले आफुलाई अब्बल दर्जाका प्रशिक्षकका रूपमा प्रमाणित गरिसकेका थिए ।
इटालीका ५, पोर्चुगलका २, ब्राजिल, इजरायल, नेदरल्यान्ड्स, स्पेन र इजरायलका १-१ प्रशिक्षकको सीभी लामो थियो र त्यो प्रभावशाली थियो । अहिले प्रशिक्षकका रूपमा लाम्पार्डको सीभी भर्न पनि गाह्रो हुन्छ, खेलाडी छँदै यस्तो थिए भनेर गफ दिनु पर्छ ।
नभुलौं, लाम्पार्ड भर्खर ४१ वर्षका भए । चेल्सीका लागि उनले १३ वर्षमा २ सय ११ गोल गरे । त्यसक्रममा ११ ठूला उपाधि जिते । त्यसमा प्रमुख रूपमा ३ प्रिमियर लिग उपाधि र १ च्याम्पियन्स लिग पर्छ । प्रशिक्षकका रूपमा कुनै ठूलो सफलता ? शून्य । त्यो अर्थमा चेल्सीले लाम्पार्डको नाममा ठूलो न ठूलो जोखिम उठाएकै हो । लाम्पार्डको दृष्टिकोणबाट भने उनी वास्तवमै निकै भाग्यमानी रहे । खेल्न छाडेको केही वर्ष भएको छैन, सिधै प्रशिक्षक, त्यो पनि चेल्सीको ।
म्यानचेस्टर सिटीका पेप ग्वार्डिओला र लिभरपुलका योर्गन क्लोप अगाडि त लाम्पार्ड कतै छेउछाउ पनि पुग्दैनन् । तर कसैले पनि कुनै दिन आफ्नो यात्रा सुरु गर्ने त यस्तै स्थितिमा त हो । लाम्पार्डसामु आफुलाई प्रमाणित गर्ने ठूलो अवसर प्राप्त भएको छ ।
अबको केही दिनमै प्रिमियर लिग सुरु हुनेछ र यससगै सुरु हुनेछ, युरोपेली च्याम्पियन्स लिगदेखि लिगकप र एफएकप पनि । त्यसो भनेको एकपछि अर्को खेल, लगातार । चेल्सी सम्हाल्ने प्रस्ताव आउँदा उनले दायाँ पनि हेरेनन होला, बायाँ पनि हेरेनन होला ।
सिधैं हुन्छ भने होला । फेरि तिनै चेल्सी र लाम्पार्डको प्रशंसकमा फर्कने हो भने उनीहरूमा एउटा डर पक्कै हुनेछ, कतै नतिजा राम्रो हुन सकेन्, आफु अनुकुल खेल भएन भने लाम्पार्डमाथि कसरी दोष खोज्ने प्रयास गर्ने ? त्यति मात्र कहाँ हो र ? कतै अब्रामोभिचको मुड तलमाथि भयो भने ? डर एक होइन, अनेक छन् ।
लाम्पार्ड लेजेन्ड हुन्, पक्कै पनि । खेल्ने बेला उनको मैदानमा दादागिरी चल्थ्यो । अब यही शतप्रतिशत लेजेन्डगिरीमाथि प्रश्न उठाउने दिन आए भने कति नमज्जा होला ।
-1746894755.jpeg)
