विराटनगर । युनिभ मोर्डनयरा कलेजले मोरङ जिल्लास्तरीय अन्तरकलेज भलिबल प्रतियोगिताको उपाधि हात पारेको छ ।
विराटनगरको पुष्पलाल चौकको खेल मैदानमा आइतबार भएको फाइनल खेलमा मोर्डनयराले इडनबर्ग कलेजलाई ३–० को सोझो सेटमा पराजित गरेको हो ।
सुरुवाती दुई सेटमा सहजै जित निकालेको मोर्डनयराले तेस्रो सेटमा भने कठिन जित निकालेको थियो । मोर्डनयराले २५–१३, २५–१४ र २५–२३ को सोझो सेटमा जित निकाल्दै विजेता बनेको हो ।
उपाधिसँगै मोर्डनयराले ३१ हजार रुपैयाँसहित ट्रफि, मेडल र प्रमाणपत्र प्राप्त गरेको छ । यस्तै उपविजेता बनेको इडनबर्ग कलेजले नगद २१ हजारमा चित्त बुझाएको छ ।
प्रतियोगिताको विजेता टिमलाई कार्यक्रमका प्रमुखअतिथि तथा कोशी प्रदेशका खानेपानी सिचाइ तथा उर्जामन्त्री तीलकुमार मेन्याङ्वोले पुरस्कार तथा शिल्ड हस्तान्तरण गरेका थिए । यस्तै उपविजेता टिमलाई नेकपा एमाले विराटनगर महानगर कमिटीका अध्यक्ष तथा मदन भण्डारी स्पोर्ट्स एकेडेमी कोशी प्रदेशका पूर्व अध्यक्ष सागर थापाले पुरस्कार तथा शिल्ड हस्तान्तरण गरेका थिए ।
प्रतियोगिताको सर्वोत्कृष्ट खेलाडी चुनिएका मोर्डनयराका रविन गौतमले नगद १० हजार प्राप्त गरेका छन् । यस्तै उत्कृष्ट स्पाइकरमा इडनबर्गका सुमन बुढाथोकी, उत्कृष्ट सेटरमा मोर्डनयराका दमन खवास, उत्कृष्ट सर्बरमा मोर्डनयराका पुकार तामाङ, उत्कृष्ट लिब्रोमा मोर्डनयराका योगेश राई, उत्कृष्ट ब्लकरमा इडनबर्गका विराज थापा र उदयमान खेलाडीमा इडनबर्गका सुसन धिमाललाई पुरस्कृत गरिएको थियो । उनीहरुले जनही ५–५ हजार प्राप्त गरेका छन् ।
मदन भण्डारी स्पोटर्स एकेडेमी विराटनगर महानगर कमिटीको आयोजनामा गत बिहीबारबाट सञ्चालन भएको प्रतियोगितामा ९ टिमले सहभागीत जनाएको खेल संयोजक नवराज नेपालले जानकारी दिए ।
