पोखरा। इरानी टोलीले प्रथम लायन्स कप राष्ट्रिय तथा अन्तर्राष्ट्रिय आमन्त्रित पुरुष भलिबल प्रतियोगिताको उपाधि जितेको छ।
पोखरा रंगशालास्थित बहुउद्देश्यीय कभर्ड हलमा भएको फाइनल खेलमा नेपाल पुलिस क्लबलाई ३–१ को सेटमा हराउँदै इरानी टोलीले उपाधि जितेको हो।
पहिलो सेट २५–१८ ले आफ्नो पक्षमा पारेको इरानी टोलीले दोस्रो सेट २४–२६ ले गुमाएको थियो। तेस्रो र चौथो सेटमा पुनरागमन गर्दै इरानी टोलीले उपाधि उचाल्यो। इरानले तेस्रो सेट २५–१८ र चौथो सेट २५–१७ ले आफ्नो पक्षमा पारेको हो।
उपाधि जितेको इरानी टोलीले चार लाख ४४ हजार ४४४ हात पार्यो। उपविजेता बनेको पुलिसले दुई लाख ४४ हजार ४४४ मा चित्त बुझायो।
यसअघि सशस्त्र प्रहरी बल (एपिएफ) लाई ३–१ को सेटमा पराजित गर्दै त्रिभुवन आर्मी क्लबलले तेस्रो स्थान हासिल गरेको थियो। पहिलो सेट २९–२७ र दोस्रो सेट २५–२१ ले आफ्नो पक्षमा पारेको आर्मीले तेस्रो सेट एपिएफलाई सुम्पिएको थियो। तेस्रो सेट २२–२५ ले गुमाएको आर्मीले चौथो सेट २५–२३ ले जित निकाल्दै तेस्रो हुन सफल भयो। तेस्रो हुने आर्मीले एक लाख ४४ हजार ४४४ प्राप्त गर्यो।
इरानी टोलीका आमिर हुसेन सर्वोत्कृष्ट खेलाडी घोषित भए। उनले १४ हजार ४४४ रुपैयाँ र ट्रफी प्राप्त गरे। इरानी टोलीका अफ्सिन फतेह उत्कृष्ट सर्भर, इरफान नरोइजु उत्कृष्ट ब्लकर, दीपक थापा उत्कृष्ट डिफेन्डर, पुलिसका बलराम गुरुङ उत्कृष्ट सेटर, आर्मीका धनबहादुर भट्ट उत्कृष्ट स्पाइकर र इरानी टोलीका सुरेन्द्र केसी उत्कृष्ट प्रशिक्षक बने। उनीहरूले जनही आठ हजार ४४४ रुपैयाँ र ट्रफी पुरस्कार पाए।
-1746457651.jpeg)
