एजेन्सी । यूईएफए च्याम्पियन्स लिग फुटबलमा आज स्पेनिस क्लब रियल मड्रिडले इटालीको इन्टर मिलानसँग प्रतिस्पर्धा गर्दैछ।
रियलले इन्टरसँग उसैको मैदान सानसिरोमा खेल्नेछ । दुई टिमबीचको खेल नेपाली समय अनुसार राति १:४५ बजे सुरु हुनेछ ।
बलियो टिम इन्टरविरुद्ध मैदान उत्रदा रियल महत्वपूर्ण जितको खोजीमा हुनेछ ।
किनकि नकआउट चरणमा स्थान बनाउन रियललाई जित महत्वपूर्ण रहेको छ ।
च्याम्पियन्स लिगकै सर्वाधिक सफल टिम रियलले ३ खेलमा मात्र ४ अंक जोडेको छ ।
समूह 'बी' को रियल तालिकाको तेस्रो स्थानमा रहेको छ ।
तर, इन्टरविरुद्ध रियलका स्ट्राइकर करिम बेन्जिमाले खेल्ने छैनन् । उनी चोटका कारण टिममा छैनन् ।
यस्तै कप्तान सर्जियो रामोस पनि चोटका कारण इन्टरविरुद्ध खेल्ने छैनन् ।
यता, इन्टरलाई पनि रियलविरुद्धको खेल महत्वपूर्ण रहेको छ ।
इन्टर ३ खेलमा २ अंक जोडेर समूहको पुछारमा रहेको छ ।
नकआउट चरणको सम्भावना कायम राख्न इन्टरलाई जित अत्यावश्यक नै रहेको छ ।
यस अघि रियलको मैदानमा भएको खेलमा रियलले इन्टरलाई ३-२ ले हराएको थियो ।
यसै समूहको अर्को खेलमा बोरुसिया मुन्छेनग्लाडबाखले शाख्तर डोनेस्कटसँग खेल्नेछ ।
मुन्छेनग्लाडबाख ५ अंक जोडेर शीर्ष स्थानमा रहेको छ ।
शाख्तर ४ अंकसहित तालिकाको दोस्रो स्थानमा रहेको छ ।
