एजेन्सी । कोलम्बियाले सन् २०२० को कोपा अमेरिकाको फाईनल आयोजना गर्ने भएको छ । कोलम्बियाको फुटबल महासंघले समाचारको पुष्टि गर्दै कोपाको फाईनल खेलको आयोजना कोलम्बियाले गर्ने बताएको हो ।
प्रतियोगिताको सह आयोजकको रुपमा अर्जेन्टिनाले सन् २०२० को कोपा आयोजना गर्दैछ । तर कोलम्बियाको फुटबल महासंघले दोस्रो पटक आफुहरुले फाईनल खेल आयोजना गर्ने पक्का भएको जनाएको हो ।
कोलम्बियाले सन् २००१ मा कोपा अमेरिकाको आयोजना गरेको थियो । फाईनलमा मेक्सिकोलाई १–० ले हराउँदै कोलम्बियाले पहिलो पटक उपाधि जितेको थियो ।
‘कोलम्बिया फुटबल महासंघको कार्यसमिति बैठक गौरवका साथ घोषणा गर्छ कि सन् २०२० मा अर्जेन्टिना र कोलम्बियामा हुने कोपा अमेरिकाको फाईनल खेल हाम्रो देशमा हुनेछ ।’ फुटबल महासंघले जारी गरेको बिज्ञप्तीमा भनिएको छ ।
फुटबल महासंघले दक्षिण अमेरिकी फुटबलको सबै भन्दा ठुलो प्रतियोगिताको फाईनल खेल आयोजना गर्न पाउनु खुसीको बिषय रहेको बताएको छ ।
‘हामी दक्षिण अमेरिकी फुटबल महासंघलाई आश्वस्त गराउन चाहन्छौ कि फाईनल सफल बनाउन हामी सबै प्रकारको शक्ति प्रयोग गर्नेछौ ।’ बिज्ञप्तीमा भनिएको छ ।
अर्जेन्टिनाले सन् २०११ को कोपा अमेरिका आयोजना गरेको थियो । उसले यस बर्ष सेमिफाईनलमा ब्राजिलसंगको भिडन्त पक्का गरेको छ । शुक्रबार भएको खेलमा अर्जेन्टिनाले भेनेजुएलालाई पराजित गरेको थियो ।
कोलम्बिया यस पटकको प्रतियोगितामा क्वाटरफाईनलबाटै बाहिरिएको छ । कोलम्बिया टाईब्रेकरमा चिलीसंग पराजित हुदै प्रतियोगिताबाट बाहिरिएको हो ।
