काठमाडौं । लिभरपुल समर्थकको मनको कुनै कुनामा अझै पनि राफेल बेनिटेजका लागि ठाउँ हुनु पर्छ । सन् २००५ मा लिभरपुलले युरोपेली च्याम्पियन्स लिग जित्दा प्रशिक्षक यिनै स्पेनी त थिए ।
चेल्सीमा छँदा पनि निलो होइन, रातो टाइ लगाउने बेनिटेज लिभरपुल समर्थकलाई मन नपरेर कसलाई मन पर्छ त ? पक्कै पनि अहिले उपलब्ध फुटबल प्रशिक्षकमा अब्बल दर्जाका छन् । त्यसैले पनि उनको राम्रै सम्मान छ, सबैतिर । उनले लिभरपुल मात्र होइन, रियल मड्रिड जत्तिको ठूलो क्लब पनि सम्हाले ।
अहिले उनीबारे यो सबै चर्चा किन भन्दा केही दिन भयो, उनले अर्को इंग्लिस प्रिमियर लिग क्लब न्युकासल युनाइटेड छाडेको । पछिल्लो सिजन चल्दै गर्दा कतै बेनिटेजले क्लब छाड्ने त होइन भने डर उत्पन्न भइसकेको थियो । क्लब मालिक र उनको सम्बन्ध राम्रो हुन सकेको थिएन् । क्लब मालिक माइक एस्ली चाहन्थे, टिम त्यसरी नै चलिरहोस, जसरी अहिले चलिरहेको छ । त्यो भनेको ठीकठीकै क्लब चलाउने । अझ त्यो भनेको रेलिगेसनमा पनि नपर्ने, तर केही जित्न खर्च पनि नगर्ने ।
एस्ली बेलायती धनाद्य व्यापारी हुन् । अहिले न्युकासलका समर्थकहरूले उनको चर्को विरोध गरिरहेका छन् । अझ न्युकासलको प्रसिद्ध घरेलु मैदान सेन्ट जेम्स पार्क अगाडि ती समर्थकले ब्यानर नै लिएर एस्लीको विरोध गरिरहेका छन् । उनीहरूको आरोप हो, एक त बेनिटेजलाई क्लबमा राखिरहन नसक्नु एस्लीको दोष हो, दोस्रो उनले जसरी क्लब हाँकिरहेका छन्, त्यो ठीक भएन् । आफुलाई ज्यान भन्दा प्यारो क्लब जथाभावी चलाएपछि डाइहार्ड फ्यानको मन दुख्छ नै ।
अहिले तत्काल न्युकासल नयाँ प्रशिक्षकको खोजीमा छ । सिजन सुरु हुन अगाडि कोही न कोहीले टिम सम्हाल्ने नै छन् । तर न्युकासललाई लिएर फेरि एउटा कथा दोहरिएको छ, जसमा पीडा मात्र छ । भनिन्छ, इंग्ल्यान्डमा न्युकासलको समर्थन गर्ने भनेको पीडा सहनु मात्र हो । जुन क्लबले केही जित्न सक्दैन, उल्टै हार्छ र तल तल भासिँन खोज्छ, त्यही क्लबको आजीवन समर्थक रहनु कम्ती गाह्रो हुन्न । त्यसैले त फुटबललाई निर्दयी खेल भनिएको ।
तर फुटबल निर्दयी भएपछि यसको एउटा नियम के हो भने जीवनमा एकपल्ट कुनै क्लबको समर्थन गरिसकेपछि त्यसमा परिवर्तन हुने गर्दैन, चाहे आफ्नो टिमले जितोस अथवा नजितोस । जितेको टिमको मात्र समर्थन गर्ने त कायर हुन्, ती खास समर्थन हुनै सक्दैनन् । फेरि खास कुरामै फर्केने हो भने न्युकासलमा घटिरहेको घटनालाई तीन पक्षबाट हेर्नु पर्छ र नतिजा आउने गर्छ, त्यसमा कोही पनि जित्न सकेन् । न क्लब, न क्लब मालिक । न त तिनै बेनिटेज ।
सबैभन्दा पहिले क्लबको नजरबाट । सन् १८९२ मा स्थापित क्लब हो, यो । त्यसो भनेको १ सय २६ वर्ष भयो । यति धेरै समयमा क्लबले केही नै नजितेको पनि होइन, तर नजितेको धेरै भयो । अझ प्रिमियर लिग सुरु भएयता न्युकासलले केही जित्न नसकेको हो । जति जिते, ती इतिहास भइसके । तर पनि इंग्ल्यान्डमै सर्वाधिक लोकप्रिय केही क्लबको नाम लिनु पर्दा, न्युकासल अगाडि नै आउँछ । सेन्ट जेम्स पार्कमा ५० हजार घटी दर्शक कमै अवसरमा मात्र हुने गर्छ ।
अब यही क्लबले बेनिटेज जत्तिको प्रशिक्षक गुमाएको छ । घाटा त भयो नै । बेनिटेजले पनि त न्युकासल जत्तिको क्लब गुमाएको छ । घाटा उनलाई पनि छ । लिभरपुल र रियल जत्तिको क्लब सम्हालेका बेनिटेजले अब दोहराएर सायद नै अरू क्लब पाउने छन् । उनलाई निकै ठीक भनेको न्युकासल जस्तै क्लब हो, जसको इतिहास पनि छ, समर्थक पनि छ । घाटाकै कुरामा एस्ली मात्र कहाँ चोखो रहे । उनले सबै गुमाएका छन्, समर्थकको मायादेखि अरू धेरै ।
यस्तोमा सबैभन्दा ठूलो घाटा तिनै समर्थकलाई भएको छ । त्यसो भनेको यो ‘कोही नजितेको खेल’ भयो । यी सबै सुन्दा न्युकासलकै समर्थन नभएर पनि नमज्जा भने लाग्छ । न्युकासल कत्तिको क्लब हो भनेर बुझ्न एउटा राम्रो उदाहरण छ, पुराना खेलाडी एलान सिएररलाई लिएर । प्रिमियर लिग युगका सबैभन्दा उत्कृष्ट खेलाडीमा पर्छन्, उनी । सन् १९९६ मा उनीसामु नया“ क्लब जाने दुई विकल्प थियो, पहिलो न्युकासल, दोस्रो म्यानचेस्टर युनाइटेड ।
उनले न्युकासल रोजे । खासमा उनी न्युकासलका दबरदस्त समर्थक पनि थिए । म्यानचेस्टर गएको भए, एलेक्स फर्गुसनको नेतृत्वमा उनले सबथोक जितेका हुन्थे । उनकै कारण म्यानचेस्टर अझ बढी जित्न सक्थ्यो । तर न्युकासलमा रहेर सिएररले केही पनि जित्न सकेनन् । खेल जीवनबाट सन्यास लिइसकेपछि उनसँग यसैलाई लिएर प्रश्न गरियो, न्युकासल रोजेकोमा पश्चाताप त छैन ? उनको उत्तर थियो, पटक्कै छैन । बरू खुसी पो छ, आफ्नो मनको कुरा सुनेकोमा ।
उनले भनेका थिए, ‘म्यानचेस्टर गएको भए, मैले धेरै जितेको हुन्थें । तर मनमा सधैं एउटै गुनासो हुन्थ्यो, मैले मनको कुरा सुन्न सकिनं भनेर । न्युकास रोजेर मैले केही पनि उपाधि जित्न सकिनं, तर मेरो मन भने खुसी छ, मैले त्यही क्लबबाट खेलें, जुन मलाई असाध्यै मन पर्छ ।’
यस्तो क्लब हो, न्युकासल । तर यस्तै क्लबमा प्रायः अहिलेको जस्तो घटना भइरहन्छ । यति बेला कुनै क्लबका समर्थकको मन बढी रोइरहेको छ भने त्यो न्युकासलकै होला ।
