काठमाडौं । अखिल नेपाल फुटबल संघ एन्फाले आयोजना गरेको उपमेयर कप अन्तर नगरपालिका महिला फुटबल खेल्न काठमाडौं आएको एक टिम प्रतियोगिताको बाँकी खेल नखेलेरै घर फर्किएको छ ।
सशस्त्र प्रहरी बलको हलचोकमा जारी प्रतियोगितामा दोलखाको भिमेश्वर नगरपालिका अन्तिम एक खेल नखेलेरै घर फर्किएको छ ।
छैठौ दिन मंगलबार अन्तिम खेलमा गोदावरी नगरपालिका र दोलखाको भिमेश्वर नगरपालिका प्रतिस्पर्धा गर्ने तय थियो ।
अपराह्न ४ बजे हुने खेलमा भिमेश्वर नगरपालिका खेल खेल्न नआएको हो ।
समूह सी अन्तर्गतको खेलमा भिमेश्वर सुरुवाती ३ खेलमा पराजित भएको थियो ।
तर प्रतियोगिता संयोजक पेमा लामाले भने आफुलाई घटनाबारे सुरुमा जानकारी नभएको बताईन् ।
‘मलाई सुरुमा जानकारी भएन । मैदान पुग्दा टिम आएको रैनछ ।’ उनले भनिन् ।
‘टिम नआएको कारण भने खुल्न सकेको छैन । बुझेर कारबाहि गर्छौ ।’ पेमाले थपिन् ।
प्रतियोगितामा सहभागी हुन आएको भिमेश्वर नगरपालिका पहिलो खेलमा काठमाडौं महानगरपालिकासँग १५–०, चन्द्रपुर नगरपालिकासँग २२–० र बाह्रविशे नगरपालिको दोस्रो टिमसँग ३–१ गोल अन्तरले पराजित भएको थियो ।
तर समुह चरणको अन्तिम खेल नखेल्दै टिम घर फर्किएको हो । सोमबार बाह्रविशेसँग पराजित भए लगत्तै टिम आयोजकलाई कुनै जानकारी नदिएर घर फर्किएको बुझिएको छ ।
सहभागी समूह सीकै एक प्रशिक्षकले प्रतियोगितामा लगातारको हारका कारण टिम खेल छोडेर हिडेको बताए ।
भिमेश्वरले खेल छोडेसँगै गोदावरीले भने स्वतः तीन अंक हात पारेको छ ।
एन्फाले पहिलो पटक आयोजना गरेको प्रतियोगितामा १८ नगरपालिकाको सहभागीता रहको छ । प्रतियोगिताको फाइनल खेल असार १३ गते रहेको छ ।
-1746894755.jpeg)
