काठमाडौं । स्याङ्जाको वालिङ नगरपालिका राजधानीमा जारी उप-पमेयर कप अन्तर नगरपालिका महिला फुटबल प्रतियोगिताको सेमिफाइनलमा प्रवेश गरेको छ ।
सोमबार भएको लिग चरणको अन्तिम खेलमा बाँसगढी नगरपालिकासँग गोलरहित बराबरी खेल्दै वालिङले सेमिफाइनलमा स्थान बनाएको हो ।
हलचोकस्थित एपीएफको मैदानमा दुवै टोलीले पाएको मौका सदुपयोग गर्न नसक्दा बराबरी खेलेको हो । योसँगै वालिङ प्रतियोगिताको सेमिफाइनलमा पुग्ने पहिलो टिम बनेको छ ।
समूह 'ए' मा रहेको वालिङले २ खेलमा जित र एक बराबरीसहित ७ अंक जोड्यो । र, समूहको शीर्ष स्थानमा रहदै अन्तिम चारको यात्रा तय गर्यो ।
यस समूहमा बाँसगढीको ५ अंक रहेको छ । यस्तै घोराही तुल्सीपुरको ४ अंक रहदा शम्भुनाथ अंकविहीन रहेको छ । तीनै टिम प्रतियोगिताबाट बाहिरिएको छ । यस समूहमा तुल्सीपुर र शम्भुनाथले खेल्न बाँकी रहेको छ ।
अखिल नेपाल फुटबल संघ एन्फाको आयोजनामा पहिलो पटक भएको प्रतियोगितामा १८ नगरपालिकाको सहभागीता रहेको छ । सहभागी टिमलाई ४ समूहमा विभाजन गरिएको छ ।
प्रत्येक समूहका समूह विजेता सेमिफाइनल प्रवेश गर्नेछन् । प्रतियोगिताको फाइनल खेल असार १३ गते हुनेछ ।
