काठमाडौं । स्याङ्जाको वालिङ नगरपालिकाले राजधानीमा जारी उप–मेयर कप अन्तर नगरपालिका महिला फुटबल प्रतियोगितामा लगातार दोस्रो जित निकालेको छ ।
आइतबार भएको खेलमा वालिङले तुल्सीपुर उप महानगरपालिकालाई ५-० गोल अन्तरले पराजित गर्यो ।
हलचोकस्थित एपीएफको मैदानमा वालिङलाई जित दिलाउन अस्मिता रानापालले २ गोल गरिन् । यस्तै शान्ता नेपाली, सरस्वती हमाल र मन माया दमाईले एक एक गोल गरिन् ।
जितसंगै समूह 'ए' को वालिङले २ खेलबाट ६ अंक जोडेको छ । वालिङले पहिलो खेलमा शम्भुनाथ नगरपालिकालाई ११-० ले हराएको थियो ।
तुल्सीपुरको यो पहिलो हार हो । २ खेलमा १ अंक जोडेको तुल्सीपुरले पहिलो खेलमा बाँसगढी नगरपालिकासंग २-२ गोलको बराबरी खेलेको थियो ।
यसअघि आइतबार नै भएको खेलमा बाँसगढीले शम्भुनाथ नगरपालिकालाई १९-० गोलको फराकिलो अन्तरले पराजित गरेको थियो ।
बाँसगढीलाई जित दिलाउन राष्ट्रिय टोलीका सदस्य तथा डिफेन्डर पुजा राना मगर एक्लैले १० गोल गरिन् । यस्तै सुरक्षा सुखरिया र लक्ष्मी चन्दले ह्याट्रिक गरिन् ।
त्यस्तै गोलकिपर अन्जना राना मगरले २ गोल गरिन् । नानुमाया क्षेत्रीको नाममा एक गोल रह्यो ।
अखिल नेपाल फुटबल संघ (एन्फा) को महिला फुटबल समितिको आयोजनामा सुरु प्रतियोगितामा १८ टिमले प्रतिस्पर्धा गरिरहेका छन् ।
सहभागी १८ टोलीलाई ४ समूहमा विभाजन गरिएको छ । लिग कप नकआउटको आधारमा हुने प्रतियोगितामा विभागीय टिमको सहभागिता हुने छैन । तर, विभागीय टिमका खेलाडीले भने खेल्न पाउने छन् ।
प्रतियोगिताको विजेताले ५ लाख नगद पुरस्कार पाउने छन् । यस्तै उपविजेताले ३ लाख र फेयर प्ले टिमले ५० हजार पाउने छन् ।
प्रतियोगिताको सर्वोकृष्ट खेलाडीले २५ हजार र विधागततर्फ उत्कृष्ट हुनेले समान १०/१० हजार पाउने छन् ।
