ताप्लेजुङ । साविकको विजेता नेपाल पुलिस क्लब र गण्डकी प्रदेश तेस्रो संस्करणको पाथीभरा राष्ट्रिय पुरुष भलिबल प्रतियागिताको सेमिफाइनलमा प्रवेश गरेका छन् ।
ताप्लेजुङको मैवाखोला गाउँपालिकास्थित साँघुमा मंगलबार भएको पहिलो क्वाटरफाइनलमा प्रदेश ३ लाई ३-१ को सेटमा पराजित गर्दै पुलिसले अन्तिम चारको यात्रा तय गरेको हो ।
नारायणी माविको खेल मैदानमा पुलिसले प्रदेश ३ लाई २५-११, २४-२५, २५-१५ र २५-१४ को सेटमा पराजित गर्यो । पाँच राष्ट्रिय टोलीका खेलाडीसहित मैदान उत्रिएको पुलिसलाई दोस्रो सेटमा भने प्रदेश ३ ले रोकेको थियो । पुलिसलाई जित दिलाउन उत्कृष्ट प्रदर्शन गरेका दिपक राज जोशी म्यान अफ दि म्याच बने ।
प्रतियोगिता अन्तर्गत दोस्रो क्वाटरफाइनलमा गण्डकी प्रदेशले टियु विश्वबिद्यालय टिमलाई ३-० को सोझो सेटमा पराजित गर्दै सेमीफाइनलको यात्रा तय गर्यो । गण्डकीले विश्वबिद्यालय टिमलाई २५-१६, २५-११ र २५-१७ को सेटमा पराजित गर्यो ।
जलजले युवा क्लबको आयोजनामा जारी प्रतियोगिताको विजेताले नगद ३ लाख ५१ हजार ५ सय प्राप्त गर्ने छ । यस्तै उपविजेताले १ लाख ७६ हजार २५१ नगद प्राप्त गर्दा सेमिफाइनलमा पराजित दुई टोलीले नगद ५०-५० हजार पाउने आयोजकले जनाएको छ ।
प्रतियोगिताको सर्वोकृष्ट खेलाडीले १५ हजार पाउने छन् । व्यक्तिगत विधामा उत्कृष्ट हुने सर्भर, डिफेन्डर, ब्लकर, क्विकर, स्पाइकर र प्रशिक्षकले समान ७-७ हजार पाउने छन् ।
