काठमाडौं । शनिबार सुरु भएको बहुचर्चित टी-ट्वान्टी क्रिकेट लिग इण्डियन प्रिमियर लिग (आईपीएल) को १२ औं संस्करण नेपाली क्रिकेट प्रेमीहरुको लागि विशेष रहेको छ । किनकी, नेपाली लेग स्पिनर सन्दीप लामिछानेले आईपीएलमा लगातार दोस्रो सिजन आफ्नो जादु देखाउने छन् ।
नेपालका ग्लोबल आइकन सन्दीपले आईपीएलको डेब्यु सिजन ५ विकेट लिएका थिए । उनले ३ खेलमा उच्च प्रदर्शन गर्दै ५ विकेट लिएका थिए । डेब्यु सिजन सुरुवाती खेल खेल्न नपाएका सन्दीपले अन्तिम तीन खेलमा प्रभावशाली प्रदर्शन गरेका थिए । जसको कारण सन्दीपले त्यसपछि विश्वका धेरै फ्रेन्चचाइज टी-ट्वान्टी लिगमा पाइला चाल्न सफल भए ।
आईपीएलमा डेब्यु गरेपछिको एक बर्ष नबित्द्दै सन्दीपले धेरै लिगमा खेल्ने मौका पाए र उत्कृष्ट प्रदर्शन गरे । सन्दीपले आईपीएलमा डेब्यु गरेपछि फुर्सद नै पाएका छैनन् । आईपीएलपछि सन्दीपले क्यारेबियन प्रिमिएर लिग (सिपिएल), अष्ट्रेलियाको बिग बास लिग (बीबीएल), क्यानाडाको ग्लोबल टी-ट्वान्टी, अफगानिस्तान प्रिमियर लिग लिग, बंगलादेश प्रिमिएर लिग, पाकिस्तान सुपर लिग र घरेलु प्रतियोगितामा विभिन्न टिमबाट आफ्नो प्रतिभा देखाईसकेका छन् ।
यसबीचमा सन्दीपले ३६ टी-ट्वान्टी खेलमा ४५ विकेट हात पार्न सफल भईसकेका छन् । र, विश्वका चर्चित लिगमा सन्दीपले गरेको प्रदर्शनको कारण दिल्ली क्यापिटल्सले सन्दीपलाई रिटेन गरेको थियो । गत सिजन सन्दीप २० लाख भारुमा अनुबन्ध भएका थिए । यस सिजन उनलाई दिल्लीले त्यहिँ मुल्यमा रिटेन गरेको हो ।
दिल्लीको टिमका सबैभन्दा कान्छा खेलाडी सन्दीप नै हुन् । सन्दीप रहेको दिल्लीले शनिबार मुम्बईको ईण्डियन्सविरुद्ध खेल्दै प्रतियोगिताको सुरुवात गर्नेछ । र, सन्दीपले पहिलो खेल नै खेल्ने प्रवल सम्भावना रहेको छ ।
डेब्यु सिजनमा मुम्बईविरुद्ध उच्च प्रदर्शन गर्दै सन्दीपको ३ विकेट लिएका थिए । यस्तै दिल्लीका केहि प्रमुख विदेशी खेलाडीहरु अन्तराष्ट्रिय खेलहरुमा व्यस्त रहेका छन् ।
दिल्ली र मुम्बईको अन्तिम भेटमा नेपालका सन्दीपको बलिङ फिगर ३ विकेट ३६ रन रहेको थियो । तीन पटकको बिजेतालाई चौंथो पटक आईपीएलको प्ले अफबाट बन्चित गराउँदै दिल्लीलाई जित दिलाउन सन्दीपले उत्कृष्ट बलिङ गरेका थिए ।
आफ्नो तेस्रो टी-ट्वान्टी खेलमा आक्रामक ओपनर सुर्यकुमार यादब, उत्कृष्ट अलराउन्डर कुर्नाल पाण्ड्या र विश्वका उत्कृष्ट फिनिसर केइरन पोलार्डलाई सन्दीपले आउट गरेपछि सन्दीपको नयाँ अध्याय सुरु भएको थियो ।
दिल्ली मात्र एक टिम हो, जो अहिलेसम्म आईपीएलको फाइनल पुगेको छैन । तर, युवा खेलाडीको बाहुल्यता रहेको दिल्ली यस सिजन सन्तुलित टिम रहेको छ । यस सिजन दिल्लीको समर्थकहरुले कम्तिमा पनि प्ले अफमा पुग्ने आशा गरेका छन् ।
सन् २०१२ देखि दिल्लीले प्ले अफमा स्थान बनाउन सकेको छैन । आईपीएलको स्थापनामा सुखद सुरुवात गरेको दिल्लीले सुरुका २ सिजन सेमीफाइनलमा पुग्न सफल भएको थियो ।
आईपीएलको इतिहास हेर्दा मुम्बई निकै सफल टिम मानिन्छ । सन् २०१३, २०१५ र २०१७ को सिजन मुम्बईले उपाधिमा कब्जा जमाएको थियो ।
मुम्बईले तीन बिधाकै उत्कृष्ट खेलाडी कप्तान रोहित शर्मा, हार्दिक पाण्ड्या र जस्प्रित बुम्रालाई यस सिजन रिटेन गरेको छ ।
