एजेन्सी । इन्ग्लिश प्रिमियर लिग फुटबलको लण्डन डर्बीमा वेष्ट ह्याम युनाइटेडले सहज जित निकालेको छ । शुक्रबार राति भएको खेलमा वेष्ट ह्यामले फुलहमलाई ३-१ गोल अन्तरले हराएको हो ।
घरेलु मैदानमा वेष्ट ह्यामलाई जित दिलाउन जाभियर हर्नान्डेज, इसा डिओप र मिचाइल एन्टोनियोले एक एक गोल गरे । फुलहमका रायन बाबेलले एक गोल फर्काए ।
खेलमा सुरुवाती अग्रता फुलहमले बनाएको थियो । खेलको तेस्रो मिनेटमा बाबेलले गोल गर्दै फुलहमलाई सुरुवाती अग्रता दिलाएका थिए ।
खेलको २९ औं मिनेटमा हर्नान्डेजले गोल गर्दै वेष्ट ह्यामलाई खेलमा फर्काए । तर, हर्नान्डेजको गोल भने विवादित बन्यो ।
हर्नान्डेजले हातको सहायताले गोल गरेका थिए । उनले हेड गोल गर्ने क्रममा बाँया हातको सहायताले गोल गरेका थिए । योसंगै हर्नान्डेजले प्रिमियर लिगमा आफ्नो ५० औं गोल पुरा गरे ।
यस्तै खेलको ४० औं मिनेटमा डिओपले गोल गर्दा वेष्ट ह्यामको अग्रता २-१ को बनायो । त्यसपछि खेलको इन्जुरी समयमा एन्टोनियोले गोल गर्दै वेष्ट ह्यामलाई ३-१ को जित दिलाए ।
जितसंगै वेष्ट ह्यामले २७ खेलबाट ३७ अंक जोडेको छ । वेष्ट ह्याम लिगको नवौं स्थानमा छ । फुलहम १७ अंक जोडेर पुछारबाट दोस्रोमा छ ।
यस्तै अर्को खेलमा वाट्फोर्डले कार्डिफ सिटीलाई ५-१ गोल अन्तरले हराएको छ । वाट्फोर्डको जितमा जेरार्ड डेउलोफेउले ह्याट्रिक गरे । ट्रोय डिनीको नाममा २ गोल रह्यो । कार्डिफका सोल बाम्बाले एक गोल फर्काए ।
-1751597995.webp)
