विश्वकपबाट बाहिरिए हेजलउड

काठमाडौं। अस्ट्रेलियाका अनुभवी तीव्र बलर जोस हेजलउड अन्ततः आगामी आईसीसी टी–२० विश्वकपबाट बाहिरिएका छन्। केही समयदेखि नै उनको विश्वकप सहभागितालाई लिएर अन्योल थियो।

क्रिकेट अस्ट्रेलियाले विज्ञप्ति जारी गर्दै हेजलउड विश्वकपमा नखेल्ने पुष्टि गरेको हो। हेजलउड बाहिरिएसँगै सन् २०११ पछि पहिलो पटक अस्ट्रेलियाले कुनै विश्वकपमा आफ्ना तीन प्रमुख पेसर हेजलउड, प्याट कमिन्स र मिचेल स्टार्कबिनै प्रतिस्पर्धा गर्ने भएको छ।

ह्यामस्ट्रिङ चोटका कारण हेजलउड गत वर्ष नोभेम्बरदेखि मैदान बाहिर थिए। प्रारम्भिक टोलीमा समावेश गरिए पनि उनको फिटनेसबारे शंका कायमै थियो।

केही दिनअघि राष्ट्रिय टोलीका छनोटकर्ता टोनी डोडेमाइडले सुरुआती केही खेलमा हेजलउड उपलब्ध नहुने संकेत दिएका थिए। तर, अन्ततः ३५ वर्षीय पेसर विश्वकपबाटै बाहिरिएका छन्।

यसअघि चोटकै कारण कप्तान कमिन्स विश्वकपबाट बाहिरिएका थिए भने मिचेल स्टार्कले गत वर्ष नै टी–२० क्रिकेटबाट सन्न्यास लिएका थिए। यसले गर्दा २०११ यता पहिलो पटक यी तीनै अनुभवी पेसर अस्ट्रेलियाली टोलीमा देखिने छैनन्।

हेजलउडको अनुपस्थितिले अस्ट्रेलियाको बलिङ आक्रमण थप कमजोर बनेको छ। हालै पाकिस्तानविरुद्धको टी–२० सिरिजमा ‘क्लिन स्वीप’ भोगेको टोली अब युवा खेलाडीमा भर पर्न बाध्य भएको छ। यद्यपि, उपमहाद्वीपमा स्पिनरहरू प्रभावकारी हुने अपेक्षासहित अस्ट्रेलियाले यस पटक स्पिन विभागलाई विशेष प्राथमिकता दिएको छ।

टोलीमा दुई अनुभवी स्पिनर र दुई स्पिन अलराउन्डर समावेश गरिएका छन्।