रुविनाको हजार रन पूरा

काठमाडौं। नेपाली राष्ट्रिय टोलीको जर्सीमा अब्बल प्रदर्शन गर्दै आएकी रुविना क्षेत्री टी-२० आई क्रिकेटमा एक हजार रन पूरा गर्ने दोस्रो नेपाली महिला क्रिकेटर बनेकी छन्।

कीर्तिपुरस्थित त्रिवि क्रिकेट मैदानमा बिहीबार सम्पन्न आईसीसी महिला टी–२० ग्लोबल क्वालिफायरअन्तर्गत नेदरल्यान्ड्सविरुद्धको खेलमा उनले हजार रनको कोशेढुंगा पार गरेकी हुन्। ३२ बल खेलेकी उनले ५ चौकासहित अविजित ३७ रन बनाएकी थिइन्।

मलेसियाको बायोमास ओभलमा सन् २००९ मा इरानविरुद्ध खेल्दै नेपालको जर्सीमा डेब्यु गरेकी उनले इन्दुपछि हजार रन पूरा गर्ने कीर्तिमान बनाएकी हुन्। इन्दुले गत वर्ष अक्टोबरमा मलेसियाविरुद्धको खेलमा यो उपलब्धि हासिल गरेकी थिइन्। उनले ७७औं खेलमा एक हजार रन पूरा गरेकी हुन्।

रुविनालाई यो उपलब्धि हासिल गर्न भने चार खेल बढी खेल्नुपर्‍यो। उनले ८१औं खेलमा एक शतक र एक अर्धशतकसहित एक हजार पाँच रन पुर्‍याएकी छन्।

नेपालका तर्फबाट पहिलो शतक प्रहार गर्ने कीर्तिमान भने उनको नाममा छ।

१३ फेब्रुअरी २०२४ मा मलेसियाको क्वालालम्पुरमा भएको एसीसी प्रिमियर कपमा माल्दिभ्सविरुद्ध २२७ रन बनाउने क्रममा उनले अविजित ११८ रनको इनिङ्स खेलेकी थिइन्। यद्यपि, बिहीबारको व्यक्तिगत उपलब्धिमा उनले कुनै खुसी साटिनन्।