अर्जेन्टिनाले अंगोलासँग मैत्रीपूर्ण खेल खेल्ने

काठमाडौं। लाटिन अमेरिकाको विश्वकप छनोट सकिएको केही दिनमै अब त्यस क्षेत्रका टिमहरू तयारी खेलतर्फ ध्यान दिइरहेका छन्। त्यस क्रममा वर्तमान विश्वच्याम्पियन अर्जेन्टिनाले नोभेम्बरमा अफ्रिकी देश अंगोलासँग एक मैत्रीपूर्ण खेल खेल्ने भएको छ।

अर्जेन्टिना फुटबल संघ (एएफए) ले सामाजिक सञ्जालमार्फत यो खेलको पुष्टि गरेको हो। सुरुमा अर्जेन्टिनाले नोभेम्बरमा दुईवटा मैत्रीपूर्ण खेल खेल्ने योजना बनाएको थियो। तर, उपयुक्त प्रतिद्वन्द्वी नपाएकाले अन्ततः एउटा मात्र खेल खेलेको छ।

खेल नोभेम्बर १४ मा अंगोलाको राजधानी लुवान्डामा हुनेछ। यद्यपि, खेलको समय अझै तय गरिएको छैन। यो खेल विश्वकप पूर्व तयारीको रूपमा हेरिएको छ।

प्रशिक्षक लिओनल स्कालोनीले यस अवसरमा आफ्नो टोलीको संयोजन परीक्षण गर्नेछन्। २०२२ को विश्वकप टोलीका केही खेलाडीले सन्न्यास लिएका छन्, केही फेरि अनियमित छन्। त्यसैले आगामी २०२६ विश्वकपअघि टिममा सन्तुलन र लय ल्याउने प्रयोग गर्न चाहन्छन् स्कालोनी।

कप्तान लिओनल मेसीलाई पनि उनले अब नियमित रूपमा खेलाउने कि विश्राम दिने भन्ने विषयमा सावधानीपूर्वक योजना बनाइरहेका छन्। उनको कार्यभार नियन्त्रणमा रहोस् र नयाँ ब्याकअप खेलाडीहरू तयार गर्न सकियोस् भन्ने स्कालोनीको योजना छ।

गत अक्टोबरमा अर्जेन्टिनाले दुईवटा मैत्रीपूर्ण खेल खेलेको थियो। पहिलोमा मेसीबिना भेनेजुएलालाई १–० ले हरायो र दोस्रोमा पुएर्टो रिकोलाई ६–० ले हरायो। यो खेल मेसीले पनि खेलेका थिए।

नोभेम्बरको यो खेलअघि अर्जेन्टिना टोली युरोपमा (स्पेनमा) प्रशिक्षण शिविर बस्नेछ। खेलपछि पनि १८ नोभेम्बरसम्म अभ्यास जारी राख्नेछ, जुन मितिसम्म फिफा विन्डो खुला रहनेछ।

यसपछि २०२६ विश्वकपअघि अर्जेन्टिनाले संयुक्त राज्य अमेरिकामा मेक्सिको र हन्डुराससँग दुईवटा अन्तिम तयारी खेल खेल्नेछ। जसलाई विदाई खेल को रूपमा हेरिँदैछ।

त्यसपछि अर्को वर्ष अर्जेन्टिनाले युरोकप विजेता स्पेनसँग फिनालिसिमा खेल्नेछ। खेलको मिति औपचारिक रूपमा घोषणा नभए पनि युरोपेली सञ्चारमाध्यमका अनुसार यो खेल २०२६ मार्च २८ मा कतारको लुसाइल स्टेडियममा हुने सम्भावना छ।