काठमाडौं। नेपाल ओलम्पिक कमिटी (एनओसी) को तर्दथ समितिले तीन दिनभित्र सम्पूर्ण चल अचल सम्पत्ति बुझबुझारथ गर्न जीवनराम श्रेष्ठ नेतृत्वको अवैध कमिटीलाई निर्देशन दिएको छ।
तदर्थ समितिका सचिवालय व्यवस्थापन उपसमितिका संयोजक निलेन्द्रराज श्रेष्ठले शनिबार जीवनरामको नाममा पत्र काट्दै सम्पूर्ण चल अचल सम्पत्ति, नगद, जिन्सी सामग्री तथा माइनुट बुक बुझबुझारथ गर्न निर्देशन दिएको हो।
उक्त पत्र बोधार्थ राष्ट्रिय खेलकुद परिषद् (राखेप)का सदस्यसचिव टंकलाल घिसिङलाई समेत पठाइएको छ। राखेपले विधान विपरीत निर्वाचन र संशोधनमार्फत गठन भएको भन्दै जीवनराम नेतृत्वको एनओसी कमिटीको कार्यसमिति खारेज गरेको थियो।
श्रेष्ठले पठाएको पत्रमा भनिएको छ, “तपाईँको नेतृत्वमा गठन गरिएको भनिएको ओलम्पिक कमिटिको निर्वाचन र विधान संशोधन प्रक्रिया कानुनसम्मत नभएकोले उक्त कार्यसमिति अवैध ठहर भएको कुरा अवगत गराइन्छ।”
एनओसीमा आबद्ध खेल संघहरूको संयुक्त भेलाबाट साउन २६ गते तदर्थ समिति गठन भइसकेको छ। सो समितिलाई नेपाल सरकार र राखेपबाट आधिकारिकता समेत प्रदान गरिएको पनि पत्रमा उल्लेख छ। तदर्थ समितिले भदौ ४ गतेदेखि कामकाजको जिम्मेवारी सम्हालिसकेको जानकारी श्रेष्ठले दिएका छन्।
जीवनरामले तीन दिनभित्र सम्पत्ति हस्तान्तरण नगरे कानुनअनुसार कारबाही हुने चेतावनी पनि दिएको छ।
.jpeg)
