काठमाडौं। युवा तथा खेलकुदमन्त्री तेजुलाल चौधरीले नेपाल ओलम्पिक कमिटी (एनओसी) तदर्थ समितिलाई आगामी दिनमा अझ सक्रिय भएर अघि बढ्न निर्देशन दिएका छन्।
तदर्थ समितिका संयोजक ध्रुवबहादुर प्रधान नेतृत्वको टोलीले मन्त्री चौधरीसँग शुक्रबार मन्त्रालयमा भेटवार्ता गरेको थियो। भेटमा चौधरीले आगामी दिनमा मन्त्रालय र खेलकुद परिषदसँग समन्वय र सहजीकरण गरेर नेपाल ओलम्पिक कमिटीले आफ्ना गतिविधि बढाउन मन्त्रीले तदर्थ समितिलाई निर्देशन दिएका छन्।
नयाँ नेतृत्वले औपचारिक रूपमा कार्यभार सम्हाली भावी कार्ययोजना सार्वजनिक गरेपछि मन्त्रीसँगको यो पहिलो औपचारिक भेट हो।
भेटमा समितिका ९ सदस्यसँगै राष्ट्रिय खेलकुद परिषद् (राखेप) का सदस्य–सचिव टंकलाल घिसिङ र मन्त्रालयका खेलकुद महाशाखाका प्रमुख सहसचिव रामचरित्र मेहता पनि उपस्थित थिए।
उक्त भेटमा आगामी वर्ष जापानमा हुने एसियन खेलमा नेपालको सहभागिता सुनिश्चित गर्ने विषयलाई प्राथमिकतामा राखिएको थियो। साथै, नेपाल ओलम्पिक कमिटीका गतिविधिलाई कानुनबमोजिम सक्रिय बनाउन राखेप र मन्त्रालयले खेल्नुपर्ने भूमिकाबारे पनि छलफल भएको छ।
भेटमा तदर्थ समितिका संयोजक प्रधानले सरकारले गरेको सहयोगका लागि खेलकुद मन्त्रीलाई धन्यवाद दिदै ओलम्पिक विवाद समाधानमा सरकारको तर्फबाट आवश्यक समन्वय र सहयोगको अपेक्षा गरेका थिए ।
ओलम्पिकमा आबद्ध २३ खेल संघ मिलेर ओलम्पिकको तदर्थ समिति गठन गरेका छन् । समितिले अन्तराष्ट्रिय ओलम्पिक कमिटीसँग सहकार्य गरेर निष्पक्ष निर्वाचन गर्ने घोषणा गरेको छ ।
सरकारको निर्देशन, अदालतको आदेशलाई अबज्ञा गर्दै जीवनराम श्रेष्ठले ओलम्पिकको निर्वाचनमार्फत आफुलाई घोषणा गरेपछि ओलम्पिकमा नयाँ विवाद सुरु भएको थियो । सरकारले श्रेष्ठ नेतृत्वको ओलम्पिक निर्वाचनलाई अवैधानिक रहेको बताउँदै सो निर्वाचन प्रकृयालाई खारेज गरेर बैदेशिक यात्रामा प्रतिबन्द लगाउनेदेखि बैंक खाता रोक्का गरेको छ ।
