काठमाडौं। नेपाल ओलम्पिक कमिटीको तदर्थ कार्यसमितिले आफ्नो आगामी कार्ययोजना (राेडम्याप) सार्वजनिक गरेको छ। समितिले नेपालको ओलम्पिक गतिविधिलाई निरन्तरता दिन र आगामी अन्तर्राष्ट्रिय प्रतियोगितामा खेलाडीहरूको सहभागिता सुनिश्चित गर्ने आफ्नो मुख्य उद्देश्य बनाएको छ।
समितिले गठनबारे अन्तर्राष्ट्रिय ओलम्पिक समिति (आइओसी), एसियाली खेल संघ (ओसिए) र सम्बन्धित सरोकारवाला निकायहरूसँग आवश्यक समन्वय गर्ने योजना बनाएको छ। उत्पन्न समस्याहरूको समाधानका लागि अन्तर्राष्ट्रिय ओलम्पिक कमिटी, सदस्य खेल संघ, खेलाडी, प्रशिक्षक र सम्बन्धित सरोकारवालासँग छलफल र सुझाव लिँदै दीर्घकालीन समाधानका उपायहरू अपनाइने योजना बनाएको छ।
यसैगरी, ओलम्पिक कार्यक्रम अन्तर्गत आयोजना हुने बृहत् खेलकुद प्रतियोगितामा नेपालको सहभागिता सुनिश्चित गर्न तत्काल पहल गरिने जनाइएको छ। जापानमा आयोजना हुने २०औं एसियाली खेलकुदको तयारीका लागि परिषद् र खेल संघहरूसँग समन्वय गरी खेलाडीहरूको छनोट र विशेष प्रशिक्षणसम्बन्धी कार्यसम्पादन गरिने बताइएको छ। साथै, ओलम्पिक कमिटीसँग आबद्ध खेल संघहरूको समस्या समाधानका लागि आवश्यक पहल पनि गरिने योजना छ।
समितिले ओलम्पिक कमिटीको विधानअनुसार पारदर्शी, निष्पक्ष र स्वतन्त्र ढंगले साधारण सभाबाट निर्वाचन गरी नयाँ नेतृत्व चयन गर्ने प्रक्रिया अघि बढाउने योजना पनि बनाएको छ। नेपाल ओलम्पिक कमिटी, तदर्थ समितिका सदस्य एवं प्रवक्ता समिम मियाँ अन्सारीले समितिको कार्ययोजना कार्यान्वयनमा सबै सरोकारवालाको सक्रिय सहभागिता र सहयोगको अपील गरेका छन्।
