काठमाडौं। समीर कुमारको दुई गोलसँगै नेपाल पुलिस क्लबले एन्फा यु–१६ युथ लिगको अंक तालिकामा आफ्नो स्थान पकड बनाएको छ।
सातदोबाटोस्थित एन्फा कम्प्लेक्समा बिहीबार सम्पन्न खेलमा पुलिसले हिमालयन शेर्पा क्लबलाई ३–० ले पराजित गरेको हो।
जितसँगै पुलिसले १२ खेलबाट ३१ अंक पुर्याएको छ। समान खेल खेलेको शेर्पा १४ अंकसहित नवौं स्थानमा छ। पुलिसलाई जित दिलाउन समीरबाहेक दीप्सन पाण्डेले अर्को गोल थपे।
खेलको ३१औं मिनेटमै दीप्सनले सुरुआती अग्रता दिलाएका थिए। त्यसको ७ मिनेटपछि समीरले अग्रता दोब्बर बनाए।
६७औं मिनेटमा समीरले अर्को गोल थप्दै पुलिसको एकतर्फी जित सुनिश्चित गरे।
