काठमाडौं। भुटानले साफ यु–१७ महिला च्याम्पियनसिपमा बंगलादेशलाई बराबरीमा रोकेको छ।
भुटानको राजधानी थिम्पुस्थित चाङ्लिमिथाङ रंगशालामा शुक्रबार सम्पन्न दोस्रो लेगमा घरेलु टोलीले उपाधिको दाबेदार मानिएको बंगलादेशलाई १–१ गोलको बराबरीमा रोकेको हो।
पहिलो लेगमा बंगलादेशले भुटानलाई ३–१ को हार चखाएको थियो। यसपल्ट पनि बंगलादेशले खेलको छैटौं मिनेटमै पूर्णिमा मर्माको गोलमार्फत सुरुआती अग्रता लिएको थियो।
तर, पहिलो हाफको इन्जुरी समयको पहिलो मिनेटमा छोर्टेन जाङ्गोमोले गोल गर्दै बंगलादेशबाट जित खोसिन्।
योसँगै बंगलादेशको उपाधि सम्भावनामा धक्का लागेको छ। ५ खेलबाट बंगलादेशको १० अंक छ। शीर्ष स्थानमा रहेको भारतको भने एक खेल कम खेल्दा नै १२ अंक छ।
भारतले शुक्रबार नै हुने खेलमा नेपाललाई पराजित गर्न सके एक खेलअगाबै उपाधि सुनिश्चित गर्नेछ। नेपाल भने ४ खेलबाट ३ अंकसहित तेस्रो स्थानमा छ। पुछारको भुटानको १ अंक छ।
