काठमाडौं। फ्रान्सेली क्लब पेरिस सेन्ट-जर्मेन (पिएसजी) शनिबार म्युनिखमा हुने च्याम्पियन्स लिग फाइनलमार्फत युरोपको सबैभन्दा ठूलो उपाधि जित्ने लक्ष्यमा छ। तर, यो उपलब्धि हासिल गर्न पिएसजीलाई इन्टर मिलानको चुनौती पार गर्नुपर्नेछ।
यो फाइनल दुई टोलीको भिडन्त मात्र होइन, यो दुई फरक फुटबल संस्कृति र टिम निर्माण दर्शनबीचको टक्कर पनि हो। एकातिर युरोपको पुरानो प्रतिष्ठित क्लब इन्टर छ। अर्कातिर राज्य–स्वामित्वमा रहेको आधुनिक सुपर क्लब पिएसजी।
कतारी लगानीकर्ताले सन् २०११ मा स्वामित्व लिएपछि पिएसजीले अर्बौं खर्च गरेको थियो। तर, पिएसजीले अहिलेसम्म च्याम्पियन्स लिग जित्न सकेको छैन। पिएसजी यो प्रतिष्ठित प्रतियोगिताको फाइनलमा पुगेको दोस्रोपल्ट हो।
सन् २०२० मा कोरोना महामारीका बेला लिस्बनमा भएको फाइनलमा बायर्न म्युनिखसँग पिएसजी पराजित भएको थियो। उक्त खेलमा नेयमार जुनियर र केलियन एमबाप्पेजस्ता स्टार खेलाडी थिए।
त्यसपछि लिओनल मेसीजस्ता सुपरस्टार भित्रिए पनि पिएसजीले च्याम्पियन्स लिग जित्ने सपना पूरा गर्न सकेन। अहिले यी तीन जना सुपरस्टारले क्लब छाडिसकेका छन्। तर, प्रशिक्षक लुइस एनरिकेको नेतृत्वमा युवा टोली (औसत उमेर २४ वर्षमुनि) ले युरोपका उत्कृष्ट क्लबलाई पराजित गर्दै म्युनिखसम्मको यात्रा तय गरेको छ।
उत्कृष्ट पुनरागमन
नोभेम्बरमा म्युनिखमै बायर्नसँग १–० ले पराजित भएपछि पिएसजी समूह चरणमै बाहिरिने खतरा थियो। तर, जनवरीमा गत सिजनका विजेता म्यानचेस्टर सिटीलाई हराउँदै पिएसजी लयमा फर्कियो। त्यसपछि लिभरपुल, एस्टन भिल्ला र आर्सनललाई हराउँदै फाइनलको यात्रा तय गरेको हो।
ओस्मान डेम्बेलेले सबै प्रतियोगितामा ३३ गोल गर्दै उत्कृष्ट प्रदर्शन गरिरहेका छन्। उनलाई देसाइरे डोउ, ब्राडली बारकोला र जनवरीमा भित्र्याएका ख्विचा ख्वारात्स्खेलियाले राम्रो साथ दिएका छन्। इन्टर मिलान पूर्वखेलाडी अफ्रार्च हकिमी र इटालीका नम्बर १ गोलकिपर जियानलुइजी डोन्नारुम्मा पनि उत्कृष्ट लयमा छन्।
‘हामीलाई थाहा छ, हामी कुन प्रकारको फुटबल खेल्न चाहन्छौं। अब त्यो मैदानमा देखाउने बेला आएको छ,’ प्रशिक्षक एनरिकेले भने,‘हामी पेरिसको पहिलो टोली बन्न चाहन्छौं जसले च्याम्पियन्स लिग जितेर इतिहास रच्नेछ।’ यसअघि फ्रेन्च क्लब मार्सेलीले सन् १९९३ मा म्युनिखकै पुरानो ओलम्पिक स्टेडियममा एसी मिलानलाई हराउँदै यो उपाधि जितेको थियो।
इन्टर भने आफ्नो चौथो युरोपियन कप जित्ने लक्ष्यमा छ। सन् १९६० को दशकमा इन्टरले दोहोरो सफलता हात पारेको थियो। सन् २०१० मा जोसे मोरिन्होको नेतृत्वमा मड्रिडमा भएको फाइनलमा बायर्न म्युनिखलाई हराउँदै इन्टरले तेस्रोपल्ट उपाधि जितेको थियो। प्रशिक्षक सिमोने इन्जागीको यो दोस्रो फाइनल हो। दुई वर्षअघि म्यानचेस्टर सिटीसँग फाइनलमा पराजित हुँदा पनि उनी नै प्रशिक्षक थिए।
त्यो रात इस्तानबुलमा मैदान ओर्लिएका आठजना खेलाडी शनिबार पनि सुरुआती टोलीमा हुने अनुमान गरिएको छ। इन्टरले यस सिजन बायर्न म्युनिखलाई क्वार्टरफाइनलमा र बार्सिलोनालाई सेमिफाइनलमा हराएको थियो। विशेषगरी सान सिरोमा भएको दोस्रो लेग ऐतिहासिक खेलमध्ये एक मानिएको छ। उक्त खेलमा इन्टरले पाहुना टोली बार्सिलोनालाई ४–३ ले पाखा लगाएको थियो।
‘हामी साँच्चिकै इतिहास रचना चाहन्छौं भने फाइनल जित्नैपर्छ,’ इन्जागीले भने। सम्भावित सुरुआती टोलीमा ३६ वर्षभन्दा माथिका तीन खेलाडी रहने छन्। इन्टरले ३-५-२ फर्मेसनमा खेल्नेछ। पिएसजी भने ४-३-३ को फर्मेसनमा। इन्जागी भन्छन्, ‘हामीलाई थाहा छ, यो कठिन खेल हुनेछ। तर, पिएसजीजस्तै हामी पनि उपाधिका लागि आएका हौं। हामी उत्कृष्ट प्रदर्शन दिने कोसिस गर्नेछौं।’
