एजेन्सी । चेल्सी काराबाओ कप फुटबलको फाइनलमा प्रवेश गरेको छ । बिहिबार राति भएको सेमिफाइनलमा टोटेनहमलाई पेनाल्टी सुटआउटमा ४-२ गोल अन्तरले हराउँदै चेल्सीले फाइनल यात्रा तय गरेको हो ।
घरेलु मैदानमा भएको सेमिफाइनलको दोस्रो लेगमा चेल्सीले टोटेनहमलाई २-१ गोल अन्तरले पराजित गरेको थियो । तर, पहिलो लेगमा चेल्सीले टोटेनहमसंग १-० को हार व्यहोरेको कारण खेल समग्रमा २-२ गोलको बराबरी भएको थियो । त्यसपछि खेलको निर्णय पेनाल्टी सुटआउटबाट गरिएको थियो ।
पेनाल्टी सुटआउटमा भने चेल्सीले बाजी मार्यो । चेल्सीका सिजर विलियन, सिजर एज्प्लिक्युएटा, जोर्गीन्हो र डेभिड लुइजले पेनाल्टीमा गोल गरे । तर, पेनाल्टीमा टोटेनहमका इरिक डायर र लुकास मौराले गोल गर्न सकेनन् । उसका इरिक लमेला र क्रिस्तियन एरिक्सनले गोल गरेका थिए ।
त्यसअघि खेलको २७ औ मिनेटमा एनगोलो कोन्टेले गोल गर्दै चेल्सीलाई सुरुवाती अग्रता दिलाएका थिए । खेलको ३८ औ मिनेटमा इडेन हजार्डले गोल गर्दै चेल्सीलाई २ - ० को अग्रता दिलाए । खेलको ५० औ मिनेटमा टोटेनहमका फर्नान्डो लोरेन्टले एक गोल फर्काएपछि खेल समग्रमा २-२ को बराबरीमा सकिएको थियो । पहिलो लेगमा चेल्सीलाई टोटेनहमले १ - ० ले हराएको थियो ।
अब चेल्सीले उपाधिका लागि म्यान्चेस्टर सिटीसंग खेल्नेछ । सिटी यसअघि नै फाइनलमा प्रवेश गरिसकेको छ ।
