काठमाडौं । गत वर्षको चैतमा नेपाली क्रिकेटले ऐतिहासिक सफलता प्राप्त गर्यो । जिम्बाबेमा सम्पन्न विश्वकप छनोटमा सातौ स्थानमा रहदै नेपालले चार वर्षको लागि एकदिवसीय अन्तराष्ट्रिय राष्ट्रको मान्यता पाएको थियो ।
क्रिकेटको सर्वोच्च निकाय अन्तराष्ट्रिय क्रिकेट परिषद (आईसीसी) बाट एकदिवसीय मान्यता पाउनु नेपाली क्रिकेटको सर्वाधिक ठुलो सफलता थियो । जुन सफलता पाउन नेपाली क्रिकेटले लामो यात्रा तय गरेको थियो ।
आईसीसीबाट एकदिवसीय मान्यता पाएपछि नेपालले गत असारमा नेदरल्याण्डसंग डेब्यु एकदिवसीय अन्तराष्ट्रिय सिरिज खेलेको थियो । जुन सिरिज १-१ को बराबरीमा सकीएको थियो ।
नेदरल्याण्डसंगको खेलेको करिब ७ महिनापछि नेपालले दोस्रो एकदिवसीय अन्तराष्ट्रिय क्रिकेट सिरिज खेल्दैछ । संयुक्त अरब इमिरेट्स (युएई) विरुद्ध दुबईमा हुने तीन खेलको सिरिज शुक्रबारबाट सुरु हुँदैछ । एकदिवसीय सिरिज पछि नेपालले घरेलु टोलीसंग तीन खेलको टी-ट्वान्टी सिरिज समेत खेल्नेछ ।
सिरिजका लागि नेपाली टोली युएई पुगिसकेको छ । र, नेपाल युएईमा अर्को सफलता प्राप्त गर्ने लक्ष्यमा हुनेछ । युएईविरुद्धको सिरिज जित्दै नेपाल पहिलो एकदिवसीय सिरिज आफ्नो नाममा लेखाउन चाहन्छ ।
दुबईस्थित आईसिसीको क्रिकेट एकेडमीमा शुक्रबार पहिलो खेलका लागि मैदान उत्रदै नेपाल एकदिवसीय सिरिज जित्ने सपना साकार बनाउने लक्ष्यमा हुनेछ ।
एकदिवसीय अन्तराष्ट्रिय क्रिकेटको स्वाद चाखिसकेको नेपाल सिरिज जित्न नेपाल आतुर समेत छ । युएई प्रस्थान गर्दै गर्दा कप्तान पारस खड्काले नेपाली क्रिकेट नयाँ हैसियतमा पुगेको बताउँदै पहिलो एकदिवसीय जित्ने लक्ष्य रहेको बताएका थिए ।
‘खेलाडीमा जोश र जाँगर देखिएको छ । पहिलो पटक वान डे सिरिज जित्न कोशिश गर्नेछौ ।’ कप्तान पारस भने । तर, कप्तान पारसले एकदिवसीय मान्यता नेपाली क्रिकेटका लागि अवसरसंगै चुनौती समेत रहेको स्वीकार गरे ।
‘हामी अब स्तरको क्रिकेट खेल्दैछौ । सिरिज हाम्रा लागि चुनौती समेत हो । हाम्रा सबै खेल रेकर्ड भएर बस्नेछ । सबै रकर्डको अर्थ हुनेछ,’ कप्तान पारसले थपे ।
तर, घरेलु र बलियो टोली युएईविरुद्ध सिरिज जित्न नेपाललाई निकै चुनौती छ । किनकी पछिल्लो समय नेपाली क्रिकेटको बाधक युएई बन्दै आएको छ ।
पछिल्लो पटक नेपाल एसिया कप छनोटमा युएईसंग पराजित भएको थियो । मलेसियामा सम्पन्न छनोटमा नेपाल ७८ रनले पराजित भएको थियो । यस्तै नेपाल विश्व क्रिकेट लिग डिभिजन-२ को फाइनलमा युएईसंग ७ रनले पराजित भएको थियो । त्यसअघि समूह चरणकै खेलमा भने नेपालले युएईलाई ४ विकेटले हराएको थियो ।
नेपाली क्रिकेटका लागि यस सिरिज निकै महत्वपूर्ण रहेको छ । र, नेपाली टोलीले त्यस महत्वलाई बुझेको छ । युएईसंगको सिरिजपछि नेपाल आईसीसीको विश्व वरियतामा समावेश हुनेछ । विश्व वरियतामा पुग्न कम्तिमा ३ देखि ४ अन्तराष्ट्रिय खेल खेल्नुपर्ने हुन्छ । नेपालले तीन खेलको एकदिवसीय अन्तराष्ट्रिय खेल खेलेको छ ।
यस्तै युएईसंगको सिरिज युवा खेलाडीको लागि महत्वपूर्ण खुड्किलो हुनेछ । सिरिजका लागि नेपाली टोलीमा अहिले चार युवा खेलाडीले स्थान बनाएका छन् ।
यू-१९ टोली र घरेलु लिगमा उत्कृष्ट प्रदर्शन गरिरहेका पवन सर्राफ, अविनाश बोहरा, भीम सार्की र सन्दीप जोराले सिनियर टिममा स्थान बनाएका छन् ।
नेपालले युवा खेलाडीबाट पनि निकै आशा गरेको छ । नेपाली टोलीका मुख्य प्रशिक्षक जगत टमाटाले नेपाली क्रिकेटलाई अगाडी लैजान युवा खेलाडी सक्षम रहेको बताउछन् ।
‘जुन विश्वासले हामीले नयाँ अनुहार ल्याएका छौ । नेपाली क्रिकेटलाई अगाडी लैजान्छन् भन्ने लागेको छ ।’ प्रशिक्षक टमाटाले भने ।
