एजेन्सी । स्पेनिस क्लब रियल मड्रिडले युभेन्ट्सका स्टार स्ट्राइकर पाउलो डिबालालाई अनुबन्ध गर्न तयारी थालेको छ ।
अर्जेन्टिनाका स्टार स्ट्राइकर डिबालाका लागि रियलले ९० मिलियन पाउण्डको प्रस्ताव युभेन्ट्ससामु लैजाने भएको छ । र, डिबाला पनि रियल आउन इच्छुक देखिएको इन्ग्लिश मिडिया दि सनले जनाएको छ ।
'रियल यस सिजन डिबालालाई अनुबन्ध गर्न खोजिरहेको छ,' एक स्रोतले सनलाई भनेको छ, 'डिबाला अनुबन्ध गर्न धेरै क्लबहरु इच्छुक देखिएका छन् । तर, डिबाला रियल जान इच्छुक देखिएका छन् ।'
रियलले डिबालालाई सेन्टर फरवार्डको रुपमा लिएको समेत सनले उल्लेख गरेको छ । युभेन्ट्स सहमत भए रियलले डिबालालाई यस सिजनको समरमा अनुबन्ध गर्ने बताईएको छ ।
पछिल्लो समय डिबाला युभेन्ट्सबाट अन्य क्लब जान खोजिरहेका छन् । र, डिबाला भित्र्याउन इन्ग्लिश क्लब म्यानचेस्टर सिटि, युनाईटेड र वायर्न म्युनिख समेत इच्छुक देखिएका छन् ।
सन् २०१५ मा क्लब आएका डिबालाले युभेन्ट्सबाट ११६ खेलमा ५४ गोल गरिसकेका छन् । पालेर्मोबाट युभेन्ट्स आएका डिबालाले क्लबबाट इटालियन सिरी 'ए' लगायतका उपाधिहरु जितिसकेका छन् ।
