काठमाडौं। भारतको शीर्ष तहको फुटबल लिग इन्डियन सुपर लिग (आइएसएल) स्थगित गरिएको छ।
भारतको फुटबल महासंघ (एआइएफएफ) ले शनिबार विज्ञप्ति जारी गर्दै आफ्नो व्यावसायिक साझेदार रिलायन्स नेतृत्वको फुटबल स्पोर्ट्स डेभलपमेन्ट लिमिटेड (एफएसडीएल) सँगको सम्झौता नवीकरणका लागि चलिरहेको वार्ता रोकिएको जनाउँदै लिग स्थगनको घोषणा गरेको हो।
एआइएफएफअनुसार सन् २०१० मा भएको सम्झौता नवीकरण गर्ने विषयमा सर्वोच्च अदालतले अन्तरिम आदेश जारी गरेपछि वार्ता रोकिएको हो। अदालतले नयाँ संविधान लागू गर्ने मुद्दा विचाराधिन रहँदासम्म एफएसडीएलसँग सम्झौता नवीकरण नगर्न निर्देशन दिएको छ।
एआइएफएफले भनेको छ,‘हाम्रा कानुनी सल्लाहकारहरूका अनुसार २०२५ अप्रिल २६ मा सर्वोच्च अदालतमा भएको सुनुवाइका क्रममा सम्माननीय अदालतले मास्टर राइट्स सम्झौताको नवीकरण अदालतको आदेश नभएसम्म नगर्न सुझाव दिएको हो। त्यसैले कानुनी सल्लाहअनुसार सम्झौता नवीकरणका सबै प्रक्रिया हाल रोकिएको छ।”
एआइएफएफ र एफएसडीएलबीचको सम्झौता सन् २०२४ को डिसेम्बरमा समाप्त भएको थियो। २०२४–२५ सिजनको आइएसएल गत सेप्टेम्बरमा सुरु भएको थियो, जसमा १३ क्लबले भाग लिएका थिए।
एआइएफएफले भनेको छ,‘एआइएफएफ र यसका सरोकारवालाहरूले भारतीय फुटबलको हितका लागि आइएसएलको निरन्तरतामा कुनै कसर बाँकी राख्ने छैनन्। हामी सक्दो प्रयास गर्नेछौं।’
