एजेन्सी । जुन -१४, आजको दिन ! यो मिति सायद कमैलाई याद नहोला । तर, विश्व फुटबल जसले पछ्याउने गर्छन् - १४ जुन, कण्ठ हुन्छ । किन त् ?
धेरैलाई लाग्न सक्छ, अग्रेजी मिति जुन १४ आउछ जान्छ । तर, फुटबल प्रेमीहरुको लागि बिशेष दिन नै रहन्छ । कारण एउटा छ, लियोनल मेस्सी । अर्थात् यो पुस्ताकै महान खेलाडी लियोनल मेस्सीको जन्म दिन ।
अर्जेन्टिना कप्तान मेस्सी आजकै दिन जन्मिए । विश्व फुटबलमा तहल्का मच्चाए । आजकै दिनबाट मेस्सी ३१ बर्ष पुगे । रुसमा जारी २१ औं संस्करणको विश्वकप खेल्न रुस पुगेमा मेस्सीले आज जन्मदिन मनाउने छन् । भलै, आज उनको खेल छैन । नत्र, वर्थ डे गोल गर्थे कि ?
तर, रुसमा मेस्सीको जन्म दिनलाई मौका पारेर एक बेकरीले ६० केजीको चकलेटको प्रतिमूर्ति बनाएको छ । पाँच जनाले बनाएको उक्त चकलेट मेस्सीकै साइजको बनाइएको थियो । यो चकलेट आजकै दिन मेस्सीलाई देखाउने बताइएको छ ।
विश्व फुटबलले पाएको महान खेलाडी मध्ये एक हुन् मेस्सी । उनको मैदानमा मात्र हैन मैदान बाहिर उत्तिकै चर्चा हुने गर्छ । 'मेरो लागि मेस्सी महान खेलाडी हुन्,' फुटबलका पिता मानिने ब्राजिलियन लिजेण्ड पेलेले भनेका छन् ।
मेस्सी मैदानमा जति भलाद्मी भएर खेल्छन्, बाहिर त्यो भन्दा बढी छन् । लजालु छन् मेस्सी । जसकै कारण फुटबल प्रेमीहरुको प्रिय छन् । प्राय, खेलाडीहरु मैदानमा आक्रामक हुने गर्छन् । तर, मेस्सी ठिक उल्टो ।
खेलमा मेस्सीलाई आक्रामक हुनै पर्दैन गोल गर्न । उनको खुट्टामा जादु छ । भनिन्छ, मेस्सीको खुट्टामा पर्न साथ बल आफै नाच्ने गर्छ । साच्चै मेस्सीको खुट्टामा जादु र त्यसैले त् उनले फुटबलमा नपाएको केहि छैन ।
मेस्सीले आफुलाई प्रमाणित गर्न नसकेको भनेको राष्ट्रिय टोलीबाट मात्र हो । क्लब फुटबलमा उनको किर्तिमान अगन्य छ । बार्सिलोनाबाट खेल्ने मेस्सीले धेरै किर्तिमान भङ्ग गरेका छन् । कति नयाँ बनाएका छन् ।
मेस्सीले राष्ट्रिय टोलीबाट मात्र ठुला उपाधि जित्न सकेका छैनन् । उनलाई आलोचना गर्नु परे आलोचकका मुख्य बिषयबस्तु त्यहिँ हो । अन्य ठाउमा उनको आलोचना गर्ने ठाउँ नै छैन । हुन् पनि मेस्सीले तीन पटक विश्वकप खेलिसकेका छन् । मेस्सी र अर्जेन्टिनाको अहिलेको पुस्ता फाइनल यात्रा गराउनु बाहेक अन्य ठुलो उपलब्धि उनले पाएका छैनन् । कोप्पा अमेरिकामा पनि उनले फाइनल खेलेका छन् । मेस्सीले बेईजिङ ओलम्पिकमा पाएको स्वर्ण नै ठुलो उपाधि हो ।
रुस विश्वकप उनको अन्तिम विश्वकप हुनेछ । चारबर्षपछि कतारमा हुने विश्वकपमा उनलाई उमेरले साथ दिने छैन । यो उमेर उनको लागि परिपक्क उमेर हो । यो पटक मेस्सीबाट समर्थक र राष्ट्रले आशा गरेको छ । तर, रुसमा अर्जेन्टिना र मेस्सीको प्रदर्शन उच्च हुन् सकेको छैन । मेस्सीले पेनाल्टीमा गोल गर्न सकेनन् भने अर्जेन्टिनालाई दोस्रो चरण पुग्न अन्तिम खेल जित्नै पर्ने दबाब रहेको छ ।
नाइजेरियाविरुद्ध हुने खेलमा मेस्सीले जादु देखाउनेमा आम समर्थकको आशा छ । अन्तिम खेलमा मेस्सीको जादुमय प्रदर्शन भएमा अर्जेन्टिनाले विश्वकपमा राम्रो गर्ने अड्कल काटिएको छ । विश्वकप छनोटमा समेत मेस्सीकै जादुमय प्रदर्शनले अर्जेन्टिनाले रुसको टिकट काटेको थियो । छनोटको अन्तिम खेलमा उनको ह्याट्रिक निकै प्रसंसनिय थियो ।
मेस्सीले अर्जेन्टिनाको लागि १२६ खेल खेलिसकेका छन् । जसमा ७६ जित,२८ बराबरी र २२ खेलमा पराजय बेहोरेको छ । मेस्सीले अर्जेन्टिनाको लागि ६४ गोल गरेका छन् । गोलको लागि ३८ पास उपलब्ध गराउन सफल मेस्सी ५९ गोल देब्रे खुट्टाले गरेका छन् । दाहिने खुट्टाले ३ गोल गरेका मेस्सीले १३ पेनाल्टी गोल गरेका छन् ।
कलिलै उमेरमा बार्सिलोना पुगेका मेस्सीले क्लब फुटबलमा भने तहल्कै पिटेका छन् । मेस्सी बार्सिलोना पुग्नुको कहानी छुट्टै छ । अर्जेन्टिनाको रोसारियोको न्यु वेल्स ओल्ड ब्वाइजको युवा टोलीमा खेल्दै गर्दा मेस्सीमा उचाई बढ्ने हर्मोनको कमि थियो । जसको उपचार अर्जेन्टिना हुन् गार्हो थियो ।
मेस्सीले त्यतिबेलै आफ्नो फुटबलको जादु देखाउन सुरु गरेका थिए । स्पेनिस क्लब बार्सिलोनाका नजरमा परे मेस्सी । सबै उपचार खर्च क्लबले बेहोर्ने शर्तमा मेस्सी सन् २००२ मा बार्सिलोनाको एकेडमीमा भर्ना भए । मेस्सीको जादुपन त्यहिबाट सुरु भयो ।
सन् २००४ /५ को सिजन आइपुग्दा मेस्सी सिनियर टोलीमा खेल्न सक्ने भईसकेका थिए । त्यो सिजन ला लिगामा मैदान उत्रदै मेस्सी सबैभन्दा कम उमेरमा लिग खेल्ने खेलाडी बने । मेस्सी त्यतिमा मात्र सिमित भएका छैनन् निरन्तर, बार्सिलोनामा किर्तिमान बनाईरहेका छन् ।
मेस्सीले क्लब र राष्ट्रको लागि समेत गरि ६ सय गोलको आँकडा पार गरिसकेका छन् । पाँच पटकको बालोन डी' ओर बिजेता मेस्सीले बार्सिलोनाका लागि ६३७ खेल खेलिसकेका छन् । जसमा ४५१ जित,११५ बराबरी र मात्र ७१ हार बेहोरेका छन् ।
बार्सिलोनाबाट मेस्सीले ला लिगा, च्याम्पियन्स लिग, कोपा डेल रे, क्लब विश्वकप गरि ३२ उपाधि जितेका छन् । उक्त उपलब्धिमा मुख्य नायक उनै मेस्सी थिए । मेस्सीले सिनियर टोलीमा १५ बर्ष बिताईसकेका छन् । सायद, मेस्सी अझै बार्सिलोनामै रहनेछन् । मेस्सीले यो उपलब्धि पाउन बार्सिलोनाका लागि ५५२ गोल गरेका छन् । गोलको लागि २१२ पास उपलब्ध गराउन सफल मेस्सीले ६५ गोल पेनाल्टीमा ४५० गोल देब्रे खुट्टा र ७७ दाहिने खुट्टाले गरेका छन् ।
मेस्सीले बार्सिलोनाबाट खेल्दा ८ पटक ला लिगाको उपाधि जितेका छन् । कोपा डेल रे ५ पटक, ४ पटक च्याम्पियन्स लिग, सुपर कोपा ७ पटक, यूएफा सुपर कप ३ र फिफा क्लब विश्वकप ३ पटक जितिसकेका छन् ।
मेस्सीले सन् २०१५ मा ला लिगाकै सर्वाधिक सर्वकालीन गोलकर्ता बन्दै गोल्डेन बुट जितेका थिए । त्यसै ४ पटक फिफा बालोन डी'ओर र एक पटक बालोन डी' ओर पाएका छन् । मेस्सी सन् २००९ मा फिफा प्लेयर अफ दि बनेका थिए ।
