काठमाडौं । काठमाडौं जिल्लाले एनसिसिएस महिला तथा पुरुष टी–२० क्रिकेट प्रतियोगितामा ललितपुरलाई पराजित गरेको छ ।
मूलपानी क्रिकेट मैदानमा बुधबार सम्पन्न खेलमा काठमाडौंले ललितपुरलाई ३१ रनले पराजित गरेको हो। काठमाडौंले दिएको १३० रनको लक्ष्य पछ्याएको ललितपुरले निर्धारित २० ओभरमा ५ विकेट गुमाउँदै ९९ रन मात्रै बनाउन सक्यो ।
ललितपुरकी यशु पाण्डले सर्वाधिक ३५ रन बनाइन् । सविका यादव १६ रनमा आउट हुँदा रेखा तामाङ १६ रनमा अविजित रहिन् ।
काठमाडौंकी संस्कृति फूँयाल, विपिसा शाही र एली यादवले १/१ विकेट लिइन् । त्यसअघि पहिला ब्याटिङ थालेको काठमाडौंले निर्धारित २० ओभरमा तीन विकेट गुमाउँदै १३० रन बनाएको थियो ।
काठमाडौंकी अस्मिता खरेलले सर्वाधिक ३७ रन बनाइन् । कञ्चन श्रेष्ठ ३६ रनमा आउट हुँदा एली यादव १८ रनमा अविजित रहिन् । ललितपुरकी मनीषा उपाध्यय र सम्भाव्य ढकालले १/१ विकेट लिइन् ।
महिलातर्फ प्रतियोगितामा तीन टोलीको सहभागिता रहेको छ । काठमाडौंको चार खेलबाट ६ अंक छ । भक्तपुरको समान खेलबाट ३ अंक छ ।
