महिला र पुरुष दुवैतर्फको उपाधि सुर्खेतलाई 

मुगु। कर्णाली प्रदेशस्तरीय रारा कप कबड्डी प्रतियोगिताको महिला र पुरुष दुवैतर्फको उपाधि सुर्खेतले जितेका छ। 

कर्णाली प्रदेश खेलकुद विकास परिषद्को आर्थिक सहयोग र मुगु जिल्ला खेलकुद विकास समितिको आयोजनामा भएको खुला महिला र पुरुष कबड्डी प्रतियोगिताको दुवैतर्फको उपाधि सुर्खेत जितेको हो।  

शुक्रबार उपाधि लागि भएको फाइनल खेलमा पुरुषतर्फ दैलेखलाई हराउँदै सुर्खेतले उपाधि हात पारेको छ। महिलातर्फ सल्यानलाई हराउँदै सुर्खेतले उपाधि हात पारेको हो। 

फाइनल प्रतियोगितामा पुरुषतर्फ सुर्खेतले ४७ अंक प्राप्त गर्दा दैलेखले २९ मात्र बनायो। त्यस्तै, महिलातर्फ सुर्खेतले २९ अंक प्राप्त गर्दा सल्यानले २७ अंक मात्र प्राप्त गर्‍यो। 

नकआउट विधिबाट खेलाइएको खेलमा पुरुषतर्फ जाजरकोट र सल्यान तृतीय भए। महिलातर्फ जाजरकोट र कालिकोट तृतीय भयो।उक्त प्रतियोगितामा कर्णालीका पुरुषतर्फ हुम्लाबाहेक नौ जिल्लाको सहभागिता थियो। महिलातर्फ डोल्पा, हुम्ला र रुकुम पश्चिमबाहेकका अन्य ७ जिल्लाको सहभागिता थियो।