धुलिखेल। छैटौँ सहाना प्रधान स्मृति राष्ट्रिय महिला हक्की प्रतियोगितामा विभागीय टोली नेपाल आर्मी क्लबले विजयी शुरूआत गरेको छ।
धुलिखेल खेल मैदानमा भएको उद्घाटन खेलमा शनिबार आर्मीले गण्डकी प्रदेशलाई ३–० गोल अन्तरले पराजित गर्यो। आर्मीको जितमा सीमा खड्का, डम्मरा भट्ट र सरस्वती तामाङले समान १–१ गोल योगदान गरे।
खेलको २१औँ मिनेटमा सीमाले गोल गर्दै टिमलाई अग्रता दिलाइन्। आर्मीका लागि डम्मराले खेलको ५०औँ मिनेटमा गोल गर्दै टिमको अग्रता दोब्बर बनाइन्। सरस्वतीले ५६औँ मिनेटमा टिमका लागि तेस्रो गोल गरिन्। जितसँगै आर्मीले ३ अंक जोडेको छ।
नेपाल हक्की सङ्घद्वारा आयोजित प्रतियोगिताको दोस्रो खेलमा लुम्बिनी प्रदेशले अग्रता जोगाउन नसक्दा मधेस प्रदेशसँग १–१ गोलको बराबरीमा चित्त बुझाउनु पर्यो। लुम्बिनीका लागि अनन्या बर्नवालले खेलको सातौँ मिनेटमा गोल गर्दै टिमलाई अग्रता दिलाएकी थिइन्। मधेशकी आरतीकुमारी महतोले ४०औँ मिनेटमा गोल गर्दै खेललाई बराबरीमा ल्याइन्। दुवैले १–१ अंक बाँडेका छन्।
प्रतियोगिताअन्तर्गत आइतबार चार खेल हुनेछन्। पहिलो खेलमा आर्मीले बागमती प्रदेशसँग खेल्दा दोस्रो खेलमा सुदूरपश्चिम प्रदेशले मधेश प्रदेशसँग खेल्नेछ। तेस्रो खेलमा गण्डकीले बागमतीको सामना गर्दा अन्तिम खेलमा लुम्बिनी प्रदेशले सुदूरपश्चिमसँग खेल्नेछ।
प्रतियोगितामा नेपाल आर्मी, बागमती प्रदेश, गण्डकी प्रदेश, लुम्बिनी प्रदेश, मधेश प्रदेश र सुदूरपश्चिम प्रदेश गरी ६ टिमको सहभागिता रहेको छ। सहभागी टिमलाई दुई समूहमा विभाजन गरी लिग कम नकआउट आधारमा खेल खेलाइएको छ।
प्रतियोगितामा पहिलो हुने टोलीले १ लाख पाउँदा दोस्रोले ७५ हजार र तेस्रो हुनेले ५० हजार नगद पुरस्कार प्राप्त गर्ने छन्।
