मुख्यमन्त्री पुरुष भलिबलको तयारी पुरा

धनगढी । कञ्चनपुरको महेन्द्रनगरमा हुने मुख्यमन्त्री पुरुष राष्ट्रिय भलिबल प्रतियोगिताको तयारी पुरा भएको छ । भीमदत्त नगरपालिका– ४ महेन्द्रनगरको खुला मञ्चमा आइतबारदेखि सुरु हुने मुख्यमन्त्री पुरुष राष्ट्रिय भलिबल

प्रतियोगिताको सम्पूर्ण तयारी पुरा भएको आयोजकले जानकारी दिएको छ ।

सुदूरपश्चिम खेलकुद परिषद्को आयोजना एवं कञ्चनपुर जिल्ला भलिबल संघको समन्वय व्यवस्थापनमा रहेको छ । प्रतियोगितामा सातै प्रदेशका सात र सशस्त्र प्रहरी, नेपाल प्रहरी, नेपाली सेनाको टिमसहित १० टोली सहभागि छन् ।

प्रतियोगिताको विजेता टिमलाई नगद चार लाख, उपविजेतालाई दुई लाख र तेस्रो हुने टिमलाई एक लाख नगदसहित ट्रफी, मेडलका साथै प्रमाणपत्र प्रदान गरिनेछ। चौथो हुने टिमलाई सान्त्वनास्वरूप ५० हजार नगद पुरस्कारसमेत प्रदान गरिनेछ। 

सेमिफाइनलका खेलमा उत्कृष्ट प्रदर्शन गर्ने एक जना खेलाडीलाई म्यान अफ दि म्याच घोषित गरिने र घोषित खेलाडीले पाँच हजारको दरले पुरस्कार प्राप्त गर्नेछन् ।

प्रतियोगिताको सर्वोत्कृष्ट खेलाडीलाई २० हजार, विभिन्न उत्कृष्ट ६ विद्याका खेलाडीलाई जनही १०–१० हजारका दरले पुरस्कार प्रदान गरिनेछ। सदस्यसचिव दिपक सिंहले प्रतियोगितामा झन्डै ८० लाख रुपैयाँ विनियोजन गरेको बताए। उनले खेलाडी, प्रशिक्षक एवं स्वयंसेवकका लागि आयोजकले बस्ने–खाने प्रबन्ध समेत मिलाइएको छ ।  

यसअघि लगातर दुई संस्करणको सफल आयोजना गरेको सुदुरपश्चिम खेलकुद परिषद्ले यो संस्करण अझै भव्य हुने बताएको छ ।