खेल संघसँग गण्डकी प्रदेशको अन्तक्रिया

पोखरा । प्रदेश खेलकुद परिषद गण्डकीले प्रदेश खेलकुद संघसँग मंगलबार वृहत छलफलसहितको अन्तक्रिया कार्यक्रम गरेको छ ।

विभिन्न ३० भन्दा बढि खेल संघरुहको सहभागिता रहेको कार्यक्रममा प्रदेशको खेलकुद विकासका लागि खेल संघको विभिन्न समस्याका बारेमा खुलेर छलफल भएको परिषदका सदस्य सचिव श्रीधर शर्माले जनाएका छन् ।

कार्यक्रमबारे जानकारी दिंदै सदस्य सचिव शर्माले परिषदद्वारा अघि सारिएका कार्यक्रमहरु सफल बनाउन खेल संघलाई व्यवस्थित गर्ने लगायतका विषयमा निर्णय गरिएको बताए । 

“अन्तक्रियामा खुलेर छलफल गरेका छौं । खेल संघमा रहेका समस्या र चुनौतीका बीच पनि खेलकुदको समग्र विकासलाई कसरी अघि बढ्ने बारे गम्भिर रुपमा बहश भएको छ ।” उनले भने “यसले आगामी दिनमा हुने योजनाहरु कार्यान्वयनमा सहजतासंगै निकासका लागि बाटो खुल्ला गरेको छ ।”

छलफल कार्यक्रममा सहभागिले प्रदेश खेलकुद विकास ऐन २०७७ अनुसार तदर्थ समिति गठन गर्न निकै कठिनाई उत्पन्न भएको बताउँदै तत्काल सो समस्या समाधानका लागि परिषदलाई पहल गर्न आग्रह गरेका थिए ।

प्रदेश खेलकुद संघ गठन भइसकेका संघको अद्यावधिक साधारणसभा सहित प्रदेश खेलकुद परिषदमा दर्ता वा नविकरण गर्न तथा दर्ता हुन बाँकी खेल संघले तदर्थ समिति दर्ता र परिषदले संघसँग आवश्यक समन्वय गरी सहजिकरण गर्न सहभागि खेल संघका प्रतिनिधीले आग्रह गरेका थिए ।

हालै परिषदले सूचिकृतका लागि आह्वान गरेका रेफ्रि, जज, एम्पयार, खेल प्राविधिक, प्रशिक्षक र खेल प्रशिक्षण केन्द्रको सूचिकरण गर्न खेल संघले सहयोगको प्रतिवद्धता व्यक्त गर्दै गण्डकी प्रदेशमा स्थापना हुने खेलाडी कल्याणकारी कोषमा रकम वृद्धि गर्ने बताएका छन् । त्यस्तै सहभागिले जिल्लास्थित खेल संघको अनुगमन, खेलकुदको विकास, विस्तारका लागि समन्वय गर्दै अघि बढ्ने समेत प्रतिवद्धता व्यक्त गरेको गण्डकी प्रदेश खेलकुद विकास परिषद्ले जनाएको छ ।

अन्तक्रिया कार्यक्रममा आर्थिक वर्ष २०७९-०८० मा सम्पन्न विभिन्न खेलकुद प्रतियोगिता लगायत कार्यक्रमको समेत गम्भिर समिक्षा गर्दै भएका कमजोरीको समेत सुधार गर्दै अघि बढ्ने प्रतिवद्धता व्यक्त गरिएको छ ।

सो अवसरमा बोल्दै प्रदेश खेलकुद परिषदका उपाध्यक्ष धोज कुमार गुरुङले अन्तक्रिया कार्यक्रमले परिषद र खेल संघ बीच सम्बन्धलाई थप सुमधुर बनाउन भूमिका खेल्ने बताए । उनले खेल संघलाई खेल विकासको गतिका लागि प्रमुख रुपमा रहेको बताउँदै संघहरु बलियो संगै सुशासन युक्त भएमा मात्रै खेल विकासले गति लिने बताए ।

कार्यक्रममा प्रदेश खेलकुदका कार्यकारी सदस्यद्वय दिल बहादुर गुरुङ, ऋषीराम गौतम, कार्यालय प्रमुख तोपलाल भुसाल, क्षेत्रिय खेलकुदका प्रमुख लक्ष्मण प्रसाल योगी, लेखा प्रमुख निलकण्ठ ढकालले समेत आफ्ना भनाई राखेका थिए ।