काठमाडौं । राजधानीमा जारी एसीयन क्रिकेट काउन्सिल(एसीसी) प्रिमियर कपमा आज मंगलबार दुई खेल हुदैछ ।
मुलपानी मैदान र टियु मैदानमा समान १/१ खेल आयोजना हुदैछ ।
मुलपानी मैदानमा हुने खेलमा समूह 'ए' का मलेसिया र कतारबीच खेल हुदैछ ।
प्रतियोगिताबाट बाहिरी सकेको मलेसियाले आफ्नो अन्तिम खेलमा जित निकालेर सुखद अन्त्य गर्न चाहन्छ ।
मलेसिया पहिलो खेलमा नेपालसॅंग पराजित हुॅंदा दोस्रो खेलमा साउदी अरेबियालाई पराजित गरेको थियो। तेस्रो खेलमा ओमानसॅंग पराजित भएको थियो ।
लगातार दुई खेलमा हारका साथ प्रतियोगिताबाट बाहिरिसकेको कतार मलेसियालाई हराएर जितको खाता खोल्न चाहन्छ ।
पहिलो खेलमा ओमानसॅंग पराजित कतार साउदी अरेबियासॅंग दोस्रो खेलमा पराजित भएको थियो।
यस समूहबाट नेपाल सेमिफाइनल प्रवेश गरिसकेको छ भने साउदी अरेविया र ओमान मध्य एक टोली सेमिफाइन प्रवेश गर्नेछ ।
टियु मैदान कीर्तिपुरमा आयोजना हुने खेलमा समूह 'बी' का कुवेत र सिंगापुरबीच खेल हुदैछ ।
प्रतियोगिताबाट बाहिरिसकेको सिंगापुर अन्तिम खेलमा सान्त्वना जित हात पार्न चाहन्छ ।
सेमिफाइनलको झिनो सम्भावना कायम राख्न कुवेतलाई जित आवश्यक रहेको छ ।
यस समुहबाट हङकङ सेमिफाइनल प्रवेश गरिसकेको छ।
वैशाख १८ गते सम्म संचालन हुने प्रतियोगिताका खेलहरु कीर्तिपुरस्थित टियु मैदान र मुलपानीमा रहेको क्रिकेट मैदानमा खेल संचालन हुनेछ ।
कुल २४ खेल हुने प्रतियोगिताको फाइनल खेल वैशाख १८ गते टियु मैदानमा आयोजना हुनेछ ।
यस प्रतियोगितामा १० राष्ट्रको सहभागीता रहेको छ । सहभागी १० राष्ट्रलाई दुई समूहमा विभाजन गरिएको छ ।
समूह 'ए' मा आयोजक नेपाल सहित मलेसिया,साउदी अरेबिया, कतार र ओमान रहेका छन् । समूह 'बी' मा बहराइन,कुवेत,सिंगापुर,हङकङ र युएई रहेका छन् ।
हरेक समूहमा शीर्ष स्थानमा रहने दुई टोली सेमिफाइनल खेल्ने छन् । सेमिफाइनलका विजेता राष्ट्रले फाइनल खेल्ने छ।
फाइनलको विजेता टोली एसीया कपका लागि छनोट हुनेछ । एसीया कप आगामी सेप्टेम्बरमा आयोजना हुनेछ ।
यस्तै शीर्ष तीनमा रहने टोली एसीसी ईमर्जिङ कपका लागि छनोट हुनेछन् ।
