एजेन्सी । युईएफए च्याम्पियन्स लिग फुटबल अन्तर्गत समूह चरणको अन्तिम खेलमा इटालियन क्लब युभेन्ट्स पराजित भएको छ ।
बुधबार राति भएको खेलमा युभेन्ट्स स्विस क्लब योङ ब्वाईजसंग २ - १ गोल अन्तरले पराजित भएको हो ।
योङको घरेलु मैदानमा भएको खेलमा पाउल डिबालाले एक गोल फर्काएपनि युभेन्ट्सलाई हारबाट जोगाउन सकेन । योङका लागि दुवै गोल गुईलाउमी होअराउले गरे ।
स्टार स्ट्राइकर क्रिस्टियानो रोनाल्डो रहेको युभेन्ट्सविरुद्धले योङले खेलको ३० औं मिनेटमा होअराउको पेनाल्टी गोलबाट अग्रता बनाएको थियो ।
खेलको ६८ औं मिनेटमा होअराउले व्यक्तिगत दोस्रो गोल गर्दै घरेलु टोलीलाई २ - ० को अग्रता दिलाए । खेलको ८० औं मिनेटमा युभेन्ट्सका डिबालाले एक गोल फर्काए पनि युभेन्ट्स २ - १ गोल अन्तरले पराजित भयो ।
खेलमा बल पोजिसनमा पकड जमाएपनि युभेन्ट्सले गोल गर्न सकेन । उसका स्टार स्ट्राइकर रोनाल्डो गोल गर्न असफल भए ।
जितसंगै योङले च्याम्पियन्स लिग फुटबलमा पहिलो जित दर्ता गरेको छ । तर, योङ नकआउट चरणमा भने पुग्न सकेनन् ।
समूह चरणको अन्तिम खेलमा पराजित भएपनि युभेन्ट्स समूह विजेता बन्दै नकआउट चरणमा पुगेको छ । युभेन्ट्सले ६ खेलबाट १२ अंक जोड्यो । योङले ४ अंक जोड्न सक्यो ।
