एजेन्सी । स्पेनिस क्लब तथा साविकको विजेता रियल मड्रिड युईएफए च्याम्पियन्स लिग फुटबल अन्तर्गत समूह चरणको अन्तिम खेलमा पराजित भएको छ ।
बुधबार राति भएको खेलमा रियल घरेलु मैदानमा रुसी क्लब सीएसएसके मस्कोसंग ३ - ० ले स्तब्ध बनेको हो । मस्कोलाई जित दिलाउन फेडोर चालोभ, जर्जि शेनेकोभ र अर्नोर सिगुर्डसनले एक एक गोल गरे ।
घरेलु टोलीविरुद्ध पहिलो हाफमै मस्कोले दुई गोल गरेको थियो । खेलको ३७ औं मिनेटमा चालोभले गोल गर्दै मस्कोलाई सुरुवाती अग्रता दिलाए ।
खेलको ४३ औं मिनेटमा शेनेकोभले गोल गर्दै मस्कोलाई पहिलो हाफमा २ - ० को अग्रता दिलाए । त्यसपछि खेलको ७३ औं मिनेटमा सिगुर्डसनले गोल गर्दै रियाललाई ३ - ० को लजास्पद हार चखाए ।
योसंगै रियल ९ बर्षपछि घरेलु मैदानमा स्तब्ध हुन पुग्यो । यसअघि सन् २००८/९ को सिजन घरेलु मैदानमा रियल युभेन्ट्ससंग पराजित भएको थियो ।
घरेलु मैदानमा पराजित भएपनि रियल समूह 'जी' को विजेता बन्दै नकआउट चरणमा पुगेको छ । एक खेल अगावै अन्तिम १६ मा पुगेको रियलले ६ खेलबाट १२ अंक जोड्यो । मस्को ७ अंक जोडेर समूहको पुछारमै रह्यो ।
यस समूहबाट इटालियन क्लब रोमा दोस्रो स्थानमा रहदै नकआउट चरणमा पुग्यो । बुधबार राति भिक्टोरिया प्लेजेनसंग २ - १ ले पराजित भएपनि रोमाले ९ अंक जोड्यो । प्लेजेन ७ अंक जोडेर तेस्रो भयो ।
